ගෝලීය ඇලුමිනියම් වෙළඳපොළ මේ වන විට ‘කළු හංස’ (Black Swan) සිදුවීමකට, එනම් අනපේක්ෂිත සහ දැවැන්ත බලපෑමක් එල්ල කළ හැකි අර්බුදයකට මුහුණ දී සිටින බව ලොව ප්රමුඛ පෙළේ වෙළඳ සමාගමක් වන Mercuria හි ලෝහ විශ්ලේෂකයෝ පවසති. මැදපෙරදිග කලාපයේ පවතින යුදමය වාතාවරණය හේතුවෙන් එරට ඇලුමිනියම් උණු කිරීමේ මධ්යස්ථාන (Smelters) අක්රිය වීම මෙයට ප්රධානතම හේතුව වී තිබේ.
මැදපෙරදිග කලාපය වාර්ෂිකව ගෝලීය ඇලුමිනියම් සැපයුමෙන් 9%ක් හෙවත් මෙට්රික් ටොන් මිලියන 7ක පමණ ධාරිතාවකට හිමිකම් කියයි. ප්රවාහන, ඉදිකිරීම් සහ ඇසුරුම්කරණ ක්ෂේත්රයන්හි අත්යවශ්ය අමුද්රව්යයක් වන ඇලුමිනියම් සැපයුම මෙලෙස අඩාල වීම, මෙම සියවසේ මූලික ලෝහ (Base metals) ක්ෂේත්රයේ ඇති වූ විශාලතම සැපයුම් කම්පනය ලෙස ද හඳුන්වා දී ඇත.
මෙම අර්බුදය හමුවේ ලන්ඩන් ලෝහ හුවමාරුවේ (LME) ඇලුමිනියම් මිල වසර හතරකට පසු උපරිම අගය වාර්තා කර ඇති අතර, භෞතික වෙළඳපොළේ මිල ගණන් ද ශීඝ්රයෙන් ඉහළ යමින් පවතී. පවතින යුද වාතාවරණය හමුවේ සැපයුම් දාමයන් යථා තත්ත්වයට පත් කිරීමට නොහැකි වුවහොත්, 2026 වසරේ ඉතිරි කාලය පුරා ලොව පුරා දැඩි ඇලුමිනියම් හිඟයක් ඇති වනු ඇතැයි ආර්ථික විශේෂඥයෝ අනතුරු අඟවති.
