පාසලක වැසිකිලියක් ඉදිකිරීම සඳහා මුල්ගල තැබීම සම්බන්ධයෙන් තමන්ට එල්ල වන විවේචනවලට ජාතික ජන බලවේගයේ පාර්ලිමේන්තු මන්ත්රීනී අම්බිකා සැමුවෙල් මහත්මිය ඊයේ (11) පාර්ලිමේන්තුවේදී දැඩි ප්රතිචාර දැක්වූවාය. ඇය අවධාරණය කළේ තම දරුවන්ගේ සෞඛ්ය සම්පන්න අනාගතයක් වෙනුවෙන් ඕනෑම කාර්යයක් කිරීමට තමන් සූදානම් බවයි.
පසුගිය වසර 76 පුරා බලයේ සිටි කිසිදු පාලකයකු ඉටු නොකළ මූලික අවශ්යතා ඉටු කිරීම වත්මන් රජයේ වගකීම බව මන්ත්රීවරිය සඳහන් කළාය. “පොහොසත් රටක් – ලස්සන ජීවිතයක්” යන අරමුණ කරා යන ගමනේදී මහා පරිමාණ ව්යාපෘතිවලට පමණක් සීමා නොවී, බිම් මට්ටමේ පවතින අත්යවශ්ය මූලික අවශ්යතා විසඳීමෙන් මෙම ගමන ආරම්භ කළ යුතු බව ඇය පෙන්වා දුන්නාය.
සමහරුන් මෙම කටයුත්ත සමච්චලයට ලක් කළද, ජනතාවගේ මූලික අයිතිවාසිකම් වෙනුවෙන් පෙනී සිටීම තමන්ට ආඩම්බරයක් බව මන්ත්රීවරිය ප්රකාශ කළාය. විපක්ෂයට දැඩි ප්රහාරයක් එල්ල කරමින් ඇය සඳහන් කළේ, අපරාධකරුවන් වෙනුවෙන් උපවාස කරන සහ සිරගෙවල්වලට ගොස් ඔවුන්ගේ සැපදුක් විමසන අයට වඩා, දරුවන්ගේ සෞඛ්යමය අවශ්යතා වෙනුවෙන් පෙනී සිටීම වැදගත් බවයි.
වැසිකිලි ඉදිකිරීමට අමතරව, වත්මන් රජය කඳුකරයේ ආපදාවලට ලක් වූ සියලු ජනතාවට නිවාස ආධාර ලබා දීමටත්, පාලම්, බෝක්කු සහ මාර්ග පද්ධති යථා තත්ත්වයට පත් කිරීමටත් දැනටමත් පියවර ගෙන ඇති බවද මන්ත්රීවරිය පාර්ලිමේන්තුවට දැනුම් දුන්නාය. “අපි කියපු දේ අපි කරනවා” යනුවෙන් අවධාරණය කළ ඇය, සමාජ ජීවන තත්ත්වය ඉහළ නංවමින් රට ඉදිරියට ගෙන යාමට ජාතික ජන බලවේගය කැපවී සිටින බව වැඩිදුරටත් පැවසුවාය.
