සේවක අර්ථසාධක අරමුදලේ සාමාජිකයින්ට හිමිවිය යුතු ප්‍රතිලාභ සුරැකීම සඳහා සමගි ජන බලවේගය විසින් ඉදිරියේදී සංශෝධන ගෙන එනබව කොළඹ දිස්ත්‍රික් පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා පවසයි.
ඒ මහතා ඊයේ (12) කොළඹ පැවැති මාධ්‍ය අමතමින් සඳහන් කළේ සමගි ජන බලවේගයේ ආර්ථික කමිටුව මගින් මෙම සංශෝධන ඉදිරිපත් කරන බවයි.
එහිදී සාමාජිකයින්ට නිශ්චිත අවම ප්‍රතිලාභයක් තීරණය කිරීම හෝ අනිකුත් ආයෝජන සඳහා ලැබෙන පොලී ආදායමට සමාන පොලී ප්‍රතිලාභයක් ගෙවීම හෝ ධන මූර්ත පොලියක් ගෙවීම සඳහා මෙම සංශෝධන යෝජනා මගින් මග පෙන්වන බව හෙතෙම පැවසිය.
එසේම මේ වනවිට මේ අරමුදලේ ගිණුම් ලක්ෂ 196 ක් තිබෙන අතර මෙයින් ලක්ෂ 26 ක් විතර සක්‍රීය පවතින බව මන්ත්‍රීවරයා අනාවරණ කලේය.
මොවුන්ට ලැබෙන ප්‍රතිලාභය ඉදිරි 15 වසර තුළ ස්ථීර විය යුතු අතර එහෙයින් සංශෝධන ඉදිරිපත් කිරීමට බලාපොරොත්තු වන බව මන්ත්‍රීවරයා පැවසීය.
