විවිධ ආයතන මගින් විසිරී පවතින ප්රතිපාදන ඒකාබද්ධ කර, නිශ්චිතව හඳුනාගත් පවුල් ඒකක ඉලක්ක කරගනිමින් දුගී බව තුරන් කිරීමේ විද්යාත්මක වැඩපිළිවෙළක් ක්රියාත්මක කළ යුතු බව ජනාධිපති අනුර කුමාර දිසානායක මහතා පවසයි.
ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීම් අමාත්යාංශයේ 2026 වසරේ ව්යාපෘති ප්රගතිය සමාලෝචනය සහ 2027 අයවැය යෝජනා පිළිබඳ පූර්ව සාකච්ඡාවකදී ජනාධිපතිවරයා මෙම අදහස් පළ කළේය.
සමාජ සුබසාධන ප්රතිලාභ ලබන පවුල් සැබෑ ලෙසම සවිබල ගැන්වෙන්නේද යන්න මැනිය හැකි විධිමත් මිණුම් ක්රමවේදයක් සකස් කිරීම රජයේ අපේක්ෂාවයි. මෙම වසර තුළ අස්වැසුම ප්රතිලාභී පවුල් ලක්ෂ දෙකක් ඵලදායී ආර්ථික ක්රියාවලියකට යොමු කර සහනාධාර මත යැපීමෙන් මුදවා ගැනීමට සැලසුම් කර ඇති අතර, මේ වන විට පවුල් 16,000ක් සඳහා මනෝ-සමාජීය සහ ආර්ථික සහාය වැඩසටහන් ආරම්භ කර ඇත. අඩු ආදායම්ලාභීන් හුදෙක් සහනාධාර මතම රඳවා නොගෙන, වැවිලි ක්ෂේත්රය වැනි අංශවල පවතින අර්ධ කාලීන ශ්රම දායකත්වයන් සඳහා ඔවුන් යොමු කිරීමේ වැදගත්කම ජනාධිපතිවරයා අවධාරණය කළේය. කිසිදු ශ්රම දායකත්වයක් ලබා දිය නොහැකි ආබාධිත, වැඩිහිටි හෝ නිදන්ගත රෝගීන් සහිත පවුල් රජය විසින් පූර්ණ ලෙස රැකබලා ගන්නා බවත්, ශ්රම ශක්තිය සහිත පිරිස් රටේ නිෂ්පාදන ක්රියාවලියට දායක කර ගැනීමේ වැදගත්කමත් දීර්ඝ ලෙස සාකච්ඡා කෙරිණි. රැකියාවේ නියුතු මව්වරුන්ට සහ ආබාධ සහිත දරුවන් වෙනුවෙන් සැලසුම් කර ඇති දිවා සුරකුම් මධ්යස්ථාන 10ක් මේ වසර තුළ අවසන් කිරීමට සහ ඉදිරි වසර කිහිපය තුළ දිවයින පුරා එවැනි මධ්යස්ථාන 50ක් ඉදිකිරීමේ ඉලක්කයක් වෙත ගමන් කරන ලෙස ජනාධිපතිවරයා නිලධාරීන්ට උපදෙස් ලබා දුන්නේය. ආබාධිත පුද්ගලයන් සඳහා පොදු ස්ථානවල ප්රවේශ පහසුකම් සැලසීම සඳහා රුපියල් මිලියන 283ක ව්යාපෘති ක්රියාත්මක වන අතර, දායකත්ව විශ්රාම වැටුප් ක්රමය නවීන තාක්ෂණය ඔස්සේ වඩාත් විනිවිදභාවයකින් යුතුව පවත්වාගෙන යාමට පියවර ගෙන ඇත.
