ශ්‍රී ලංකාව තුළ වරාය නගරය, පුනර්ජනනීය බලශක්තිය, සංචාරක කර්මාන්තය, සන්නිවේදනය සහ යටිතල පහසුකම් ඇතුළු ප්‍රමුඛ ක්ෂේත්‍ර රැසක බහුල නව ආර්ථික අවස්ථා නිර්මාණය වී ඇති බව ප්‍රකාශ කරමින්, ශ්‍රී ලංකාවේ ප්‍රාග්ධනය ආයෝජනය කරන ලෙස ජනාධිපති අනුර කුමාර දිසානායක මහතා දේශීය හා ජාත්‍යන්තර ආයෝජකයින්ගෙන් නිල වශයෙන් ඉල්ලීමක් කරයි. ශ්‍රී ලංකාවේ ආර්ථික ප්‍රතිසංස්කරණ සහ ඉදිරි ආයෝජන අවස්ථා කෙරෙහි ජාතික මෙන්ම ජාත්‍යන්තර අවධානය යොමු කරමින් පැවැත්වුණු ‘2026 ශ්‍රී ලංකා ආර්ථික සහ ආයෝජන සමුළුව’ අමතමින් ජනාධිපතිවරයා මේ බව අවධාරණය කළේය. රට හමුවේ පවතින ආර්ථික අභියෝග ජය ගනිමින් තිරසාර වර්ධනයක් කරා ගමන් කිරීම සඳහා විදෙස් ප්‍රාග්ධනය සහ නූතන තාක්ෂණය ආකර්ෂණය කර ගැනීමේ රජයේ උපායමාර්ගික දැක්ම මෙමගින් මනාව පිළිඹිමු වේ.
ආයෝජන සඳහා සුරක්ෂිත හා හිතකර පරිසරයක් නිර්මාණය කිරීම වෙනුවෙන් විනිවිදභාවයෙන් යුත් පාලන ක්‍රමවේදයක් පවත්වාගෙන යාමටත්, ඊට අදාළ නීති හා රෙගුලාසි නූතන අවශ්‍යතාවලට ගැලපෙන පරිදි සම්පාදනය කිරීමටත් රජය පූර්ණ කැපවීමෙන් කටයුතු කරන බව ජනාධිපතිවරයා මෙහිදී පෙන්වා දුන්නේය. විශේෂයෙන්ම ඉදිරි අයවැය ලේඛනය හරහා ආයෝජන ප්‍රවර්ධනය සහ අත්‍යවශ්‍ය යටිතල පහසුකම් සංවර්ධනය උදෙසා ප්‍රමුඛතාව ලබා දෙන බව ප්‍රකාශ කළ ඒ මහතා, ජාත්‍යන්තර ආයෝජකයන් සමග ඵලදායී ලෙස සහසම්බන්ධ විය හැකි ශක්තිමත් දේශීය ව්‍යාපාරික ප්‍රජාවකගේ අවශ්‍යතාවද පෙන්වා දුන්නේය. විනිවිදභාවයෙන් තොර අතීත ආර්ථික පරිපාලනය වෙනුවට නීතියේ ආධිපත්‍යය සුරකින නව ව්‍යාපාරික වටපිටාවක් ස්ථාපිත කිරීම මෙම ප්‍රතිපත්තිමය නීතිරීතිවල මූලික අරමුණ වී තිබේ.
රාජ්‍ය තාන්ත්‍රික හා ආර්ථික විචාරකයින් පෙන්වා දෙන්නේ ජනාධිපතිවරයාගේ මෙම ආරාධනාව සහ රජයේ ප්‍රතිසංස්කරණ වැඩපිළිවෙළ හරහා ඉදිරි වසරවලදී මෙරටට සෘජු විදේශ ආයෝජන (FDI) ගලා ඒම සැලකිය යුතු ලෙස ඉහළ යනු ඇති බවයි. විශේෂයෙන්ම ඉදිරි අයවැය යෝජනා මගින් ආයෝජන පහසුකම් සැලසීමේ නිල යාන්ත්‍රණයන් තවදුරටත් ශක්තිමත් කෙරෙනු ඇතැයි අපේක්ෂා කරන අතර, එය මෙරට විදේශ විනිමය සංචිත වර්ධනය කිරීමට මෙන්ම නව රැකියා උත්පාදනයටද සෘජුවම දායක වනු ඇත. දේශීය හා විදේශීය ආයෝජන සුරක්ෂිත කෙරෙන මෙම නව ආර්ථික ගමන්මග, ශ්‍රී ලංකාව කලාපීය ආයෝජන කේන්ද්‍රස්ථානයක් බවට පත්කිරීමේ ඉදිරි පියවරක් ලෙසද ක්ෂේත්‍රයේ ප්‍රඥාවන්තයෝ හඳුන්වා දෙති.
