ඇපල් (Apple) සමාගමේ නව ප්රධාන විධායක නිලධාරී ලෙස වැඩ භාරගත් ජෝන් ටර්නස් (John Teus), X සමාජ මාධ්ය ජාලයේ “hello” යනුවෙන් තැබූ සරල සටහන මිලියන 56ක නැරඹුම් වාර ගණනක් වාර්තා කිරීමට සමත්ව තිබේ. එක්ස් හිමිකරු එලෝන් මස්ක් එම සටහනට “welcome” යනුවෙන් පිළිතුරු සපයා තිබූ අතර, ධවල මන්දිරයේ හිටපු කෘත්රිම බුද්ධි (AI) උපදේශක ශ්රීරාම් ක්රිෂ්ණන්ද ඔහු වෙනුවෙන් සටහනක් තබා තිබිණි.
වසර 15 ක් පුරා ඇපල් සමාගම මෙහෙයවූ ටිම් කුක්ගෙන් පසුව, සැප්තැම්බර් 1 වන දා සිට ක්රියාත්මක වන පරිදි ජෝන් ටර්නස් මෙම ධුරයට පත්ව ඇති අතර, ටිම් කුක් ඉදිරියටත් ඇපල් සමාගමේ විධායක සභාපති ලෙස කටයුතු කරනු ඇත. 50 හැවිරිදි ටර්නස් වසර 25 කට ආසන්න කාලයක් ඇපල් සමාගමේ සේවය කර ඇති අතර, 2001 දී සමාගමේ නිෂ්පාදන සැලසුම් කණ්ඩායමට එක්වී 2013 දී හාඩ්වෙයාර් ඉංජිනේරු විද්යා පිළිබඳ උප සභාපතිවරයා බවට පත් විය. 2021 දී ජ්යෙෂ්ඨ උප සභාපති ලෙස විධායක කණ්ඩායමට එක්වූ ඔහු iPhone, iPad, Mac, Apple Watch සහ AirPods නිෂ්පාදනය කළ ඉංජිනේරු කණ්ඩායම් අධීක්ෂණය කරනු ලැබීය. ඇපල් සමාගමට සම්බන්ධ වීමට පෙර Virtual Research Systems ආයතනයේ යාන්ත්රික ඉංජිනේරුවෙකු ලෙස සේවය ආරම්භ කළ ඔහු, පෙන්සිල්වේනියා විශ්වවිද්යාලයෙන් යාන්ත්රික ඉංජිනේරු විද්යාව පිළිබඳ උපාධියක් ලබා ඇත.
2011 දී ස්ටීව් ජොබ්ස්ගෙන් පාලනය භාරගත් ටිම් කුක්, ඇපල් ව්යාපාරය දැවැන්ත ලෙස ව්යාප්ත කිරීමට නායකත්වය දුන් අතර, අගෝස්තු මස අවසානයේදී තමා ප්රධාන විධායක නිලධාරී ධුරයෙන් ඉවත් වන බව පසුගිය අප්රේල් මාසයේදී නිවේදනය කළේය.
