සයිබර් ආරක්ෂණ ක්ෂේත්රයේ ප්රමුඛයෙකු වන Arctic Wolf සමාගම පරිශීලක නාම සහ මුරපද (Credentials) සොරාගැනීමේ උත්සාහයන් කල්තියා හඳුනා ගැනීම සඳහා ‘Decipio’ නමින් නව මෙවලමක් පසුගිය අප්රේල් 22 වනදා හඳුන්වා දුන්නේය. සයිබර් ප්රහාරකයන් ජාලයක් තුළට ඇතුළු වූ පසු ඉතා රහසිගතව දත්ත සොරාගැනීමට උත්සාහ කරන බැවින් ඒවා සාමාන්ය ජාල ගමනාගමනය සමඟ මිශ්ර වී හඳුනා ගැනීමට අපහසු වේ. ‘Decipio’ නිර්මාණය කර ඇත්තේ මෙම ගැටලුවට විසඳුම් ලබා දීමටයි.
මෙම මෙවලම මගින් ජාලය තුළ සැබවින්ම නොපවතින ව්යාජ පද්ධති නිර්මාණය කර ඒවා වෙත සම්බන්ධ වීමට ඉල්ලීම් යොමු කරන ‘උගුල් ඇටවීම’ (Trap laying) සිදු කරයි. සාමාන්ය පද්ධති මෙම ඉල්ලීම් නොසලකා හරින නමුත් රහසිගතව දත්ත සොයන ප්රහාරකයන් මෙම ව්යාජ ඉල්ලීම්වලට ප්රතිචාර දක්වන බැවින් ජාලය තුළ අනවසර පුද්ගලයෙකු සිටින බව ක්ෂණිකව තහවුරු කරගත හැකිය. එමගින් ප්රහාරකයා සොරකම් කරන ලද දත්ත භාවිත කර ජාලය තුළ තවදුරටත් ඉදිරියට යාමට හෝ හානියක් කිරීමට පෙර ඔවුන්ව එසැණින් හඳුනා ගැනීමට උපකාරී වේ.
දැනට මෙම මෙවලම පවතින්නේ පරීක්ෂණ මට්ටමේ (Closed beta) වන අතර එය භාවිත කිරීමට අවස්ථාව ලැබෙන්නේ සමාගම විසින් අනුමත කරන ලද සයිබර් ආරක්ෂණ විශේෂඥයින්ට පමණි. ප්රහාරයකින් හානියක් සිදු වූ පසු ඊට ප්රතිචාර දැක්වීම වෙනුවට ප්රහාරකයා හඳුනාගත් විගස ක්රියාත්මක විය යුතුයි යන ආරක්ෂක මූලධර්මය මත පදනම්ව මෙය නිර්මාණය කර ඇති බව Arctic Wolf සමාගම අවධාරණය කරයි. මෙම නවතම තාක්ෂණය හරහා සයිබර් ප්රහාරකයන්ට එරෙහිව වඩාත් ශක්තිමත් ආරක්ෂක පවුරක් ගොඩනැගීමට හැකිවනු ඇතැයි අපේක්ෂා කෙරේ.
