ඇමෙරිකානු ජනාධිපති ඩොනල්ඩ් ට්රම්ප් ඝාතනය කිරීමේ අරමුණින්, ගිනි අවි ද රැගෙන ෆ්ලොරිඩා ජනපදයේ පිහිටි ඒ මහතාගේ මාර්-ඒ-ලාගෝ (Mar-a-Lago) මන්දිරයට අනවසරයෙන් ඇතුළු වීමට උත්සාහ කළ පුද්ගලයෙකුට ජනපති ආරක්ෂක අංශ එල්ල කළ වෙඩි ප්රහාරයකින් එම පුද්ගලයා මියගොස් තිබේ. අද (22) රාත්රියේ වාර්තා වූ මෙම පුවතත් සමඟ අමෙරිකානු ජනාධිපතිවරයාගේ ආරක්ෂාව සම්බන්ධයෙන් යළිත් ලෝක අවධානය යොමු වී ඇත.
අමෙරිකානු ජනපති ආරක්ෂක සේවයේ (Secret Service) ප්රකාශක ඇන්තනි ගුග්ලියෙල්මි ‘එක්ස්’ පණිවුඩයක් නිකුත් කරමින් මෙම සිදුවීම තහවුරු කර තිබේ. ආරක්ෂක අංශ නිලධාරීන්ගේ වෙඩි ප්රහාරයට ලක් වූ අදාළ සන්නද්ධ පුද්ගලයා එම ස්ථානයේදීම ජීවිතක්ෂයට පත්ව ඇති බව මාධ්ය වාර්තා පෙන්වා දෙයි. සිද්ධිය වන අවස්ථාවේදී ජනාධිපතිවරයා මන්දිරය තුළ සිටියේද යන්න පිළිබඳව මෙතෙක් නිල තොරතුරු අනාවරණය වී නොමැත.
මෙම අනවසර ඇතුළු වීමත් සමඟ මාර්-ඒ-ලාගෝ මන්දිරය අවට ආරක්ෂාව දැඩි කර ඇති අතර, අදාළ පුද්ගලයා කවුරුන්ද යන්න සහ ඔහු මෙම ප්රහාරය සැලසුම් කළ ආකාරය පිළිබඳව ෆෙඩරල් විමර්ශන අංශ (FBI) පුළුල් පරීක්ෂණයක් ආරම්භ කර තිබේ. මීට පෙර ද අවස්ථා කිහිපයකදීම ජනාධිපති ට්රම්ප් ඉලක්ක කර ගනිමින් මෙවැනි ප්රහාරයන් එල්ල වීමට උත්සාහ දැරූ අතර, මෙය එහි නවතම සිදුවීම ලෙස සැලකේ.
