පුත්තලම, අරුවක්කාලු හුණුගල් නිධිය ආශ්රිතව පවතින වටිනා ඛනිජ වැලි සම්පත් උපයෝගී කරගනිමින් නව ආයෝජන අවස්ථා හඳුනා ගැනීම සඳහා ආයෝජකයින්ගෙන් අභිලාෂ ප්රකාශ (EOI) කැඳවීමට අමාත්ය මණ්ඩල අනුමැතිය හිමිව තිබේ. කර්මාන්ත සහ ව්යවසායකත්ව සංවර්ධන අමාත්යවරයාගේ කැබිනට් සංදේශයකට අනුව මෙම තීරණය ගෙන ඇත.
අරුවක්කාලු හුණුගල් නිධිය මතුපිට පසෙහි අන්තර්ගත ඛනිජ වැලි වෙන් කිරීම සහ එම පසෙන් ගත හැකි උපරිම ප්රයෝජන පිළිබඳ ආයෝජන අවස්ථා සොයා බැලීම මෙහි ප්රධාන අරමුණයි. මීට පෙර ශ්රී ලංකා සිමෙන්ති සංස්ථාව පෞද්ගලික සමාගම් සමඟ එළඹ තිබූ ගිවිසුම්වල පවතින නීතිමය ගැටලු සහ අධිකරණයේ පවතින නඩුකර සම්බන්ධයෙන් නීතිපතිවරයාගේ උපදෙස් ලබා ගැනීමට රජය තීරණය කර ඇත.
විනිවිදභාවයකින් යුත් ටෙන්ඩර් පටිපාටියක් හරහා සුදුසුම ආයෝජකයා තෝරා ගැනීම සඳහා විශේෂ ව්යාපෘති කමිටුවක් සහ කැබිනට් මණ්ඩලය මගින් පත්කරන ලද සාකච්ඡා සම්මුති කමිටුවක් (CANC) පත් කිරීමට ද අනුමැතිය ලැබී තිබේ. මෙහිදී පරිසර අමාත්යාංශයේ නිරීක්ෂණවලට යටත්ව කටයුතු කිරීම අනිවාර්ය වන අතර, තෝරා ගන්නා ආයෝජකයා එම පාරිසරික කොන්දේසිවලට අනුකූල විය යුතුය.
මෙම ස්වභාවික සම්පත් මගින් මෙරට ආර්ථිකයට උපරිම ප්රතිලාභ ලබා ගැනීම රජයේ අරමුණ වී තිබේ.
