“දූවිල්ලෙන් සෑදුණු මිනිසා දූවිල්ලටම හැරෙන්නේය” යන බයිබලානුකුල පණිවිඩය සිහිපත් කරමින්, කිතුණු බැතිමතුන්ගේ අතිශය වැදගත් ආගමික සමය වන චතාරික සමය අද (18) ආරම්භ වේ. චතාරිකයේ පළමු දිනය වන අළු බදාදා දිනයේදී, බැතිමතුන් දේවස්ථාන වෙත ගොස් පසුගිය වසරේ ‘තොසන්නා’ (Palm Sunday) ඉරිදා දින ලබාගත් තැඹිලි අතුවලින් සාදාගත් අළු නළලෙහි තවරා ගනිමින් තමන්ගේ අනිත්යභාවය සහ පසුතැවිල්ල ප්රකාශ කරති.
මෙම සමය පාස්කු ඉරිදාට පෙර දින 40ක කාලයක් (ඉරිදා දින හැර) පැවැත්වෙන අතර, එය ජේසුස් වහන්සේ කාන්තාරයේ දින 40ක් නිරාහාරව සිටිමින් මුහුණ දුන් පරීක්ෂාවන් සිහිපත් කිරීමකි. මනස්ථාපනය හෙවත් තමන් අතින් වූ වැරදි පිළිබඳ පසුතැවිලි වී දෙවියන් වහන්සේ වෙත හැරීම මෙහි මූලික අරමුණයි. ඒ අනුව, යාච්ඤාව, උපවාසය (නිරාහාරව සිටීම) සහ දන්දීම යන ප්රධාන කුළුණු ත්රිත්වය මත පදනම්ව බැතිමතුන් සිය ආධ්යාත්මික ජීවිතය හැඩගස්වා ගත යුතුය.
විශේෂයෙන්ම ලෝකයේ පවතින අස්ථාවරත්වය සහ ගැටුම් මධ්යයේ, මෙවර චතාරික පණිවිඩය මඟින් “කටුක වචනවලින් වැළකී සිත පවිත්ර කරගැනීම” සහ දිළිඳු ජනතාව වෙනුවෙන් කරුණාව දැක්වීම පිළිබඳව වැඩි අවධානයක් යොමු කර ඇත. ශ්රී ලංකාවේ සියලුම කතෝලික සහ ක්රිස්තියානි දේවස්ථානවල අද දිනයේ විශේෂ දේව මෙහෙයන් පැවැත්වෙන අතර, සෙසු ආගමිකයන්ට ද ගරු කරමින් සාමකාමීව සහ භක්තිවන්තව මෙම සමය ගත කරන ලෙස ආගමික නායකයෝ ඉල්ලා සිටිති.
