ආසියානු සහ ශාන්තිකර කලාපය අද වන විට දශක කිහිපයකට පෙර නොවූ විරූ ආකාරයේ විශාල ජනවිකාස වෙනස්කම්වලට මුහුණ දී සිටී. බොහෝ රටවල් උපත් අනුපාත පහළ යාම සහ ජනගහනය වේගයෙන් වයස්ගත වීම වැනි අභියෝගවලට මුහුණ දෙන අතර, තවත් සමහර රටවල් තම විශාල තරුණ ජනගහනයේ ශක්තිය නිසි ලෙස භාවිතා කිරීමට උත්සාහ කරයි.
එක්සත් ජාතීන්ගේ ජනගහන අරමුදලේ (UNFPA) ආසියානු සහ ශාන්තිකර කලාපීය අධ්යක්ෂ ආචාර්ය ඇලෙක්සැන්ඩර් බොඩිරෝසා මහතා පෙන්වා දෙන්නේ, ජනවිකාස වෙනස්කම් හුදෙක් සංඛ්යාලේඛන හෝ උප්පැන්න අනුපාත මත පදනම්ව පමණක් තීරණය කළ නොහැකි බවයි. අනාගතය තීරණය කරන ප්රධානම සාධකය වන්නේ තරුණ පරපුරට තමන්ගේ අනාගතය පිළිබඳව පවතින බලාපොරොත්තුවයි.
ජනවිකාස වෙනස්කම් සහ තරුණ පරපුරේ යථාර්ථය සම්බන්ධයෙන් බොහෝ තරුණයින් තවමත් විවාහය සහ දරුවන් ලැබීම යන පවුල් ජීවිතය අගය කරන අතර, වර්තමාන ආර්ථික තත්ත්වය හමුවේ එවැනි ජීවිතයක් ගොඩනගා ගැනීම ඔවුන්ට ප්රායෝගිකව දුෂ්කර වී ඇත. ජීවන වියදම ඉහළ යාම, නිවාස නොමැති වීම, ස්ථාවර රැකියා අවස්ථා අඩුවීම සහ ආර්ථික අසමානතාවය තරුණ පරපුරේ අනාගත බලාපොරොත්තු බිඳ දමයි. විශේෂයෙන්ම තරුණ කාන්තාවන් වැටුප් නොලබන සත්කාරක වගකීම් වැඩි වශයෙන් දරන අතර, ස්ත්රී-පුරුෂ සමාජභාවය මත පදනම් වූ වෙනස්කම් ඔවුන්ගේ තේරීම් සීමා කරයි. මීට අමතරව අනාගතය පිළිබඳ තරුණයන් තුළ ඇති බිය සඳහා දේශගුණික විපර්යාස සහ පාරිසරික පිරිහීම ද දැඩි ලෙස බලපා ඇත.
ආචාර්ය බොඩිරෝසා අවධාරණය කරන්නේ, නිරෝගී ජනගහනයක් යනු අයිතිවාසිකම් සීමා කිරීමෙන් හෝ තරුණයින්ට පීඩනයක් එල්ල කිරීමෙන් ගොඩනැගිය හැකි දෙයක් නොවන බවයි. තිරසාර විසඳුමක් සඳහා තරුණයින්ට සිය අනාගතය ගෞරවාන්විතව සහ ආරක්ෂිතව තීරණය කළ හැකි පරිසරයක් නිර්මාණය කළ යුතුය. ගුණාත්මක අධ්යාපනය, යහපත් රැකියා අවස්ථා, දැරිය හැකි නිවාස, ප්රවේශ විය හැකි සෞඛ්ය පහසුකම්, ශක්තිමත් සමාජ ආරක්ෂණ වැඩපිළිවෙලවල් සහ ස්ත්රී-පුරුෂ සමානාත්මතාවය උදෙසා අර්ථවත් ක්රියාමාර්ග ගැනීම මෙහිදී වැදගත් වේ.
මෙම ලෝක ජනගහන දිනයේදී අප මතක තබා ගත යුතු ප්රධානම කරුණ වන්නේ, ජනවිකාස අනාගතය පෙර තීරණය කළ දෙයක් නොවන බවයි. එය අප අද ගන්නා තීරණ මත රඳා පවතී. අපට සමෘද්ධිමත් සහ ඔරොත්තු දෙන ආර්ථිකයක් අවශ්ය නම්, තරුණ පරපුරට හුදෙක් අභිලාෂයන් පමණක් නොව, ඔවුන්ගේ අනාගතය වෙනුවෙන් බලාපොරොත්තුවක් තබා ගැනීමට අවශ්ය කොන්දේසි සපුරා දීම අත්යවශ්ය වේ.
