බාලවයස්කාර දැරියක බරපතළ ලෙස ලිංගික අපයෝජනයට ලක් කිරීමේ චෝදනාව මත රිමාන්ඩ් භාරයේ පසුවූ අටමස්ථානාධිපති පල්ලේගම හේමරතන හිමියන් දැඩි කොන්දේසි සහිත ඇප මත මුදා හැරීමට අනුරාධපුර මහෙස්ත්රාත් අධිකරණය අද (22) නියෝග කළේය. ඒ අනුව රුපියල් ලක්ෂ 50 බැගින් වූ ශරීර ඇප දෙකක් සහ රුපියල් ලක්ෂයක මුදල් ඇපයක් මත උන්වහන්සේව මුදා හැරීමට අධිකරණය තීන්දු කර තිබේ.මෙම ඇප නියෝගය ප්රකාශයට පත් කරමින් මහෙස්ත්රාත්වරයා අවධාරණය කළේ පනවා ඇති ඇප කොන්දේසි උල්ලංඝනය කළහොත් හෝ නඩුවේ සාක්ෂිකරුවන්ට බලපෑම් කිරීමට කිසියම් හෝ උත්සාහයක් ගතහොත් වහාම ඇප නියෝගය අවලංගු කර යළි රිමාන්ඩ් භාරයට පත් කරන බවයි. මීට අමතරව සැකකාර හේමරතන හිමියන්ට විදේශගත වීම තහනම් කරමින් නියෝගයක් ද අධිකරණය විසින් නිකුත් කරනු ලැබීය. රිමාන්ඩ් භාරයේ පසුවෙමින් ජාතික රෝහලේ ප්රතිකාර ලබමින් සිටි හේමරතන හිමියන් ඊයේ (21) පස්වරුවේ බන්ධනාගාර රෝහල වෙත මාරු කර යවා තිබූ අතර, උන්වහන්සේව මීට පෙර ගම්පහ කොට්ඨාස පොලිස් ළමා හා කාන්තා කාර්යාංශය මඟින් අත්අඩංගුවට ගෙන අද දින දක්වා රිමාන්ඩ් කර තිබුණි.
