ශ්රී ලංකාවේ සමුද්රීය නිරීක්ෂණ කටයුතු, මෙහෙයුම් කාර්යක්ෂමතාව සහ මහජන දැනුවත්භාවය ඉහළ නැංවීමේ අරමුණින් ඕස්ට්රේලියානු දේශසීමා බලකාය සහ ශ්රී ලංකා වෙරළාරක්ෂක දෙපාර්තමේන්තුව එක්ව දියත් කරන ලද ඒකාබද්ධ සමුද්රීය ආරක්ෂණ වැඩසටහන වන ‘දිසි රැළ’ (Operation Resilient Waves) මේ වසරේදී අඛණ්ඩව තෙවන වරටත් ක්රියාත්මක වේ.
පසුගිය වසරවලදී බස්නාහිර සහ දකුණු පළාත් කේන්ද්ර කරගනිමින් සාර්ථකව ක්රියාත්මක වූ මෙම වැඩසටහන, ‘දිසි රැළ 2026’ හරහා මෙවර ශ්රී ලංකාවේ නැගෙනහිර පළාත දක්වා ව්යාප්ත කිරීමට පියවර ගෙන ඇත. “සමුද්රීය පරිසරය පිළිබඳ අවධානයෙන් සිටීම” යන තේමා පාඨය පදනම් කරගනිමින් මෙය ක්රියාත්මක වේ. මෙමගින් දේශසීමා හරහා සිදුවන මිනිස් ජාවාරම්, මත්ද්රව්ය ජාවාරම් සහ නීතිවිරෝධී ධීවර කටයුතු ඇතුළු සමුද්රීය අපරාධ මැඩපැවැත්වීම සහ බුද්ධි තොරතුරු හුවමාරු කර ගැනීම තුළින් කලාපීය ආරක්ෂාව තහවුරු කිරීම අපේක්ෂා කෙරේ.
ඕස්ට්රේලියානු රජය විසින් පසුගිය වසර තුන තුළ මෙම වැඩසටහන වෙනුවෙන් නිරීක්ෂණ ඩ්රෝන යානා 24ක්, විශේෂ ATVs රථ 3ක් සහ ස්ටැබික්රාෆ්ට් (Stabicraft) වර්ගයේ මුර සංචාරක යාත්රාවක් පරිත්යාග කර ඇත. මීට අමතරව, ‘දිසි රැළ 2026’ වැඩසටහන යටතේ ශ්රී ලංකා වෙරළාරක්ෂක දෙපාර්තමේන්තුවේ මෙහෙයුම් හැකියාවන් තවදුරටත් සවිමත් කිරීම සඳහා අතිරේක ATVs රථ 5ක් පරිත්යාග කිරීමට නියමිතය.
මෙම හවුල්කාරිත්වය පිළිබඳව අදහස් දක්වමින් ශ්රී ලංකා වෙරළාරක්ෂක දෙපාර්තමේන්තුවේ අධ්යක්ෂ ජනරාල්, රියර් අද්මිරාල් රොහාන් ජෝසප් මහතා පවසා සිටියේ, සමුද්රීය සීමාවන් ආරක්ෂා කර ගැනීමට ප්රජා සහභාගීත්වය අතිශයින්ම වැදගත් බවත්, මෙම වැඩසටහන නැගෙනහිර පළාත දක්වා ව්යාප්ත වීම ඊට මහත් පිටිවහලක් වන බවත්ය. ඒකාබද්ධ නියෝජිත ආයතන කාර්ය සාධක බලකායේ ස්වෛරී දේශසීමා මෙහෙයුම් අංශයේ අණදෙන නිලධාරී, රියර් අද්මිරාල් බ්රෙට් සොන්ටර් (RAN) මහතා ද අදහස් දක්වමින් කියා සිටියේ, අඛණ්ඩ ධාරිතා සංවර්ධනය සහ මෙහෙයුම් සහාය තුළින් කලාපය පුරා සමුද්රීය ආරක්ෂාව සුරක්ෂිත කිරීමට දෙරට එක්ව කැපවී සිටින බවයි.
සමුද්රීය සීමාව තුළ සිදුවන ඕනෑම සැක කටයුතු ක්රියාවක් පිළිබඳව පැය 24 පුරා ක්රියාත්මක 106 විශේෂ හදිසි ඇමතුම් අංකය ඔස්සේ නිර්නාමිකව තොරතුරු ලබා දිය හැකි අතර, ඒ සඳහා මහජනතාවගේ සහාය නොමඳව අපේක්ෂා කෙරේ. ඉන්දියන් සාගර කලාපය තුළ වඩාත් ආරක්ෂිත සහ ස්ථාවර සමුද්රීය පරිසරයක් නිර්මාණය කිරීම මෙහි උත්තරීතර අරමුණයි.
