බදුල්ල ශික්ෂණ රෝහලේ රක්තවේද සායනයෙන් (Haematology Clinic) සහ ප්රාදේශීය තැලසීමියා ඒකකයෙන් ප්රතිකාර ලබන රෝගීන් පවසන්නේ වෛද්ය ප්රතිකාර ලබා ගැනීමේදී සිදුවන අධික ප්රමාදයන් සහ නිතර වෛද්යවරුන් මාරු කිරීම හේතුවෙන් තමන් දැඩි අපහසුතාවයට පත්ව ඇති බවයි.
මෙම ගැටලුව සම්බන්ධයෙන් රෝගීන් සහ ඔවුන්ගේ භාරකරුවන් පවසන්නේ සායනයට පැමිණෙන රෝගීන් මෙන්ම වාට්ටුවල ප්රතිකාර ලබන රෝගීන්ට ද පරීක්ෂණ සහ ප්රතිකාර ලබා ගැනීමේදී දැඩි ප්රමාදයන්ට මුහුණ දීමට සිදුවන බවයි. අසාධ්ය තත්ත්වයේ සිටින රෝගීන් පවා පැය ගණනාවක් වෛද්යවරයෙකු හමුවන තෙක් බලා සිටීමට සිදුවන අවස්ථා ඇත. තවද, වෛද්යවරුන් නිතර මාරු කිරීම හේතුවෙන් ප්රතිකාරවල අඛණ්ඩතාව බිඳ වැටී ඇති අතර, අලුතින් පත්වන වෛද්යවරුන් බොහෝ විට දිගුකාලීන රෝගීන්ගේ වෛද්ය ඉතිහාසය පිළිබඳව නොදැනුවත්වීම ගැටලුවක් වී තිබේ. මොනරාගල, හල්දුම්මුල්ල, කොස්ලන්ද, දියතලාව සහ වැල්ලවාය වැනි දුර බැහැර ප්රදේශවලින් අඩු ආදායම්ලාභී රෝගීන් පැමිණෙන බැවින්, පෞද්ගලික අංශයෙන් පරීක්ෂණ සිදු කර ගැනීමට ඔවුන්ට හැකියාවක් නොමැත.
මේ පිළිබඳව රෝහල් පරිපාලන අංශයෙන් කළ විමසීමකදී ඔවුන් ප්රකාශ කළේ, සියලුම ස්ථාන මාරුවීම්, විශ්රාම ගැනීම් සහ පත්වීම් සිදු කර ඇත්තේ ආයතන සංග්රහය සහ නියමිත ක්රියා පටිපාටිවලට අනුකූලව බවයි. සෞඛ්ය සේවා අධ්යක්ෂ ජනරාල්වරයාගේ උපදෙස් මත මෙම ස්ථාන මාරුවීම් ක්රියාවලිය රටපුරාම ක්රියාත්මක කර ඇති බවත්, මීට පෙර වසර ගණනාවක් තිස්සේ නියමිත පරිදි වෛද්යවරුන් මාරු කිරීම් සිදු කර නොතිබූ බවත් ඔවුන් පෙන්වා දෙයි. ස්ථාන මාරු ලැබ ගිය වෛද්යවරුන් වෙනුවට පත් කර ඇති නව වෛද්යවරුන් මඟින් ඉදිරියේදී සාමාන්ය පරිදි සේවාවන් අඛණ්ඩව ලබා දීමට කටයුතු කරන බව පරිපාලන අංශය වැඩිදුරටත් සඳහන් කරයි.
