ශ්රී ලාංකේය අධ්යාපන ක්ෂේත්රයේ විශිෂ්ට මෙහෙවරක් ඉටුකරන බත්තරමුල්ල ශ්රී ඉන්දජෝති විද්යාලය සිය 115 වන සංවත්සරය මහත් අභිමානයෙන් සමරයි. පාසලේ වත්මන් විදුහල්පතිනි තමරා සමරසේකර මහත්මියගේ සංකල්පයක් මත ක්රියාත්මක වන මෙම සංවත්සර උත්සව මාලාව, පාසලේ ආදි කර්තෘවරුන් සිහිපත් කරමින් පින් අනුමෝදන් කිරීම සහ විද්යාලයේ අනාගත දියුණුව උදෙසා ආශිර්වාද ප්රාර්ථනා කිරීමේ අරමුණින් සංවිධානය කර ඇත.
මෙම පුණ්ය වැඩසටහන්වලට සමගාමීව හෙට (26) දින සර්ව රාත්රික පිරිත් දේශනයක් පැවැත්වෙන අතර, අනිද්දා (27) උදෑසන ස්වාමීන් වහන්සේලා උදෙසා පිරිනැමෙන සාංඝික දානමය පින්කමකින් සංවත්සර වැඩසටහන් අවසන් වීමට නියමිතය. පාසලේ ආදි ශිෂ්ය සංගමයේ පූර්ණ දායකත්වයෙන් සහ ආචාර්ය මණ්ඩලය, සිසු දරු දැරියන් මෙන්ම දෙමාපියන්ගේ ද එකමුතුවෙන් මෙම කටයුතු සැලසුම් කර තිබීම විශේෂත්වයකි.
එසේම, පොසොන් පුන් පොහොය දිනට සමගාමීව හෙට පස්වරුවේ විද්යාලයේ දරු දැරියන් විසින් ඉදිරිපත් කරනු ලබන බැති ගී ප්රසංගයක් ද පැවැත්වීමට කටයුතු යොදා ඇත. 115 වසරක අභිමානවත් ඉතිහාසයක් ඇති ශ්රී ඉන්දජෝති විද්යාලයේ අනාගත ගමන වඩාත් සාර්ථක කර ගැනීම උදෙසා මෙම ආගමික සහ සංස්කෘතික වැඩසටහන් මහත් පිටුබලයක් වනු ඇත.
