කොළඹ බේරේ වැව පිරිසිදු කිරීමේ කෙටිකාලීන විසඳුමක් ලෙස කරදිය (මුහුදු ජලය) මුදාහැරීමේ විශේෂ තාක්ෂණික ව්යාපෘතියක් ආරම්භ කිරීමට නියමිත අතර, එහි සම්පූර්ණ පිරිවැය පෞද්ගලික පරිත්යාගශීලියෙකු විසින් දැරීමට එකඟ වී තිබේ. ප්රකට ව්යාපාරිකයෙකු මෙන්ම ඉංජිනේරුවරයෙකු වන නහිල් විජේසූරිය මහතා විසින් මේ සඳහා පූර්ණ මූල්ය දායකත්වය ලබා දීමට කැමැත්ත පළ කර ඇති බව වාර්තා වේ. හුනුපිටිය ගංගාරාම විහාරස්ථානයේදී අද (09) පැවැති සාකච්ඡාවකදී මේ බව ප්රකාශ කෙරුණු අතර, එහි මුලසුන හෙබවූයේ විහාරාධිකාරී පූජ්ය කිරිඳේ අස්සජි හිමියන් විසිනි.
ශ්රී ලංකා ඉඩම් සංවර්ධනය කිරීමේ සංස්ථාව (SLLDC) මඟින් බේරේ වැවේ ස්ථාන 35කින් ලබාගත් ජල සාම්පල පරීක්ෂා කිරීමේදී එහි නයිට්රජන්, ෆොස්ෆරස් සහ ඇමෝනියා වැනි අපද්රව්ය ඉහළ මට්ටමක පවතින බවත්, ජලයේ දියවී ඇති ඔක්සිජන් ප්රමාණයට ඉන් දැඩි බලපෑම් එල්ල වී ඇති බවත් තහවුරු වී ඇත. මේ හේතුවෙන් දැනටමත් වැවේ පාවෙන අපද්රව්ය ඉවත් කිරීම, ජලජ පැලෑටි ඉවත් කිරීම සහ ගංගාරාම විහාරස්ථානය අසල නිරිතදිග කොටසේ එකතු වී ඇති රන්ඩු (මඩ) ඉවත් කිරීමේ කටයුතු සංස්ථාව මඟින් ආරම්භ කර තිබේ.
මෙම කෙටිකාලීන කරදිය ව්යාපෘතියට සමගාමීව, බේරේ වැවේ පිරිසිදුකම දිගුකාලීනව පවත්වාගෙන යාම සඳහා මෙරට අයවැය ප්රතිපාදන යටතේ විශේෂ වැඩසටහන් ක්රියාත්මක කිරීමට රජය සැලසුම් කර ඇත. කොළඹ මහා නගර සභාව, නාගරික සංවර්ධන අධිකාරිය (UDA) සහ ශ්රී ලංකා ඉඩම් සංවර්ධනය කිරීමේ සංස්ථාව (SLLDC) ඒකාබද්ධව මෙම දිගුකාලීන සංවර්ධන කටයුතු ඉදිරියට මෙහෙයවනු ඇත.
