මැදපෙරදිග කලාපයේ පවතින දැඩි නොසන්සුන්කාරී තත්ත්වය හේතුවෙන් ලෝක වෙළෙඳපොළේ බ්රෙන්ට් (Brent) වර්ගයේ බොරතෙල් මිල බැරලයක් ඩොලර් 100 සීමාව ඉක්මවා යාමත් සමඟ ඉන්දීය කොටස් වෙළෙඳපොළ අද (23) දිනයේ දැඩි පසුබෑමකට ලක්ව තිබේ. ඉරානය විසින් හෝමූස් සමුද්ර සන්ධියේදී නෞකා දෙකක් තම භාරයට ගැනීම සහ සාම සාකච්ඡා යළි ආරම්භ වීම පිළිබඳ පවතින අවිනිශ්චිතතාව මෙම තත්ත්වයට සෘජුවම බලපා ඇත.
අද පෙරවරුවේ වෙළෙඳපොළ ගනුදෙනු ආරම්භ වන විට නිෆ්ටි 50 (Nifty 50) දර්ශකය සියයට 0.72 කින් පහත වැටී 24,202.35 ක් ලෙස වාර්තා වූ අතර, සෙන්සෙක්ස් (Sensex) දර්ශකය සියයට 0.68 කින් පහත වැටී 77,983.66 ක් ලෙස සටහන් විය. විශේෂත්වය වන්නේ ඉන්දීය කොටස් වෙළෙඳපොළේ ප්රධාන ක්ෂේත්ර 16 ම අද දිනයේ පහත වැටීමක් පෙන්නුම් කිරීමයි.
මැදපෙරදිග සාම සාකච්ඡා සම්බන්ධයෙන් පවතින ගැටලුකාරී වාතාවරණය මධ්යයේ බ්රෙන්ට් තෙල් මිල අඛණ්ඩව සිව්වන දිනටත් ඉහළ යමින් බැරලයක් ඩොලර් 104 දක්වා වාර්තාගත ලෙස ඉහළ ගොස් ඇත. මෙයට සමගාමීව ආසියානු වෙළෙඳපොළ ද දළ වශයෙන් සියයට 1 ක පහත වැටීමක් වාර්තා කර ඇති අතර, බලශක්ති පිරිවැය ඉහළ යාම ඉදිරියේදී ආසියානු කලාපයේ ආර්ථිකයන්ට තවදුරටත් අභියෝගාත්මක වනු ඇතැයි ආර්ථික විශේෂඥයෝ අනාවැකි පළ කරති.
