මරණ බියෙන් තැතිගත් ජනතාව ජීවත්වන්නට බලාපොරොත්තුවක් අයදමින් සිටින අවස්ථාවක ආණ්ඩුව කළ යුත්තේ පාර්ලිමේන්තු මන්ත්රීවරුන්ට වාහන ආනයනය කිරීම නොව ගිලන් රථ ගෙන්වීමට පියවර ගැනිම බව පාර්ලිමේන්තු මන්ත්රී, ආචාර්ය හර්ෂ ද සිල්වා මහතා පවසයි.
මන්ත්රීවරයා පවසා සිටියේ ජීවන වියදම දිනෙන් දිනම ඉහළ යමින් තිබෙන බවයි. ජනතාවාදී විපක්ෂය ලෙස තමා මීට දින තුනකට පෙර පැවසූ පරිදිම සමගි ජන බලවේගයේ නායක සජිත් ප්රේමදාස මහතා ප්රමුඛ සමගි ජන බලවේගය ආණ්ඩුවෙන් ඉල්ලා සිටියේ පාර්ලිමේන්තු මන්ත්රීවරුන් සඳහා මහජන මුදල් වලින් වාහන ආනයනය කිරීමේ ආණ්ඩුවේ යෝජනාව වහාම නතර කරන ලෙසයි.
එම මුදල්ද ජනතා සුබ සිද්ධිය වෙනුවෙන් යොදවන ලෙසත් රට සහ ජනතාව කෙරෙහි මෙයට වඩා සැබෑ ආදරයකින් කටයුතු කරන ලෙසත් සමගි ජන බලවේගය මේ අවස්ථාවේ ආණ්ඩුවෙන් ඉල්ලා ඇත.
මෙම වාහන ආනයනය වෙනුවෙන් විවෘත කළ ණයවර ලිපි අවලංගු කිරීමට බැරිම නම් මෙම වාහන වෙනුවට 1990 සුවසැරිය සඳහා හදිසි අවශතාවයක් සේ සලකා ගිලන් රථ 112 ක් ගෙන්වීමට පියවර ගන්නා ලෙස තමා ආණ්ඩුවෙන් ඉල්ලා සිටින අතර මහජන මුදල් මන්ත්රීවරුන්ට වාහන ගෙන්වීම සඳහා භාවිතා නොකළ යුතුයි බව ආචාර්ය හර්ෂ ද සිල්වා මහතා වැඩිදුරටත් පවසා සිටියේය.
