ගෝලීය ආර්ථික පරිවර්තනයක් සඳහා කාන්තා නායකත්වයේ ඇති වැදගත්කම අවධාරණය කරමින් අග්රාමාත්ය ආචාර්ය හරිනි අමරසූරිය මහත්මිය අදහස් දැක්වීය. කේම්බ්රිජ් විශ්වවිද්යාලයේ වුල්ෆ්සන් විද්යාලයේදී පැවති ගෝලීය බලගතු කාන්තා සංසදයේ (GPWF 2026) ප්රධාන දේශනය ඇය විසින් පවත්වනු ලැබීය.
‘කාන්තා බලයෙන් ක්රියාත්මක වන ආර්ථිකයන්: ප්රාග්ධනය, වෙළෙඳාම සහ ආර්ථික පාලනයේ අනාගතය’ යන තේමාව යටතේ පැවති මෙම සමුළුව සඳහා ලොව පුරා රාජ්ය නායකයන්, ප්රතිපත්ති සම්පාදකයන් සහ ව්යාපාරික නායකයන් විශාල පිරිසක් එක්ව සිටියහ.
එහිදී ‘අර්බුද හරහා පාලනය: කාන්තා නායකත්වය සහ ජනතාව කේන්ද්ර කරගත් ආර්ථික පුනරුත්ථාපනයේ ව්යූහය’ යන මාතෘකාව ඔස්සේ සූම් තාක්ෂණය මගින් අදහස් දැක්වූ අග්රාමාත්යවරිය, ශ්රී ලංකාවේ ආර්ථික පුනරුත්ථාපන ක්රියාවලිය පිළිබඳ කරුණු පැහැදිලි කළාය. එහිදී ආයතනික පාලනය ශක්තිමත් කිරීම, ඩිජිටල් පරිවර්තනය සහ දැනුම මත පදනම් වූ ආර්ථික සංවර්ධනයක් උදෙසා ශ්රී ලංකාව ගමන් ගන්නා මාවත ඇය පෙන්වා දුන්නාය.
රජයේ ‘සමෘද්ධිමත් දේශයක්, ලස්සන ජීවිතයක්’ ප්රතිපත්තිමය දැක්ම පිළිබඳව අදහස් දක්වමින්, පාලනයේ සහ රාජ්ය පරිපාලනයේ ඉහළම මට්ටම් සඳහා කාන්තාවන් සවිඥානිකව ඇතුළත් කරගැනීම එහි මූලිකාංගයක් බව අග්රාමාත්යවරිය වැඩිදුරටත් අවධාරණය කළාය.
මෙම සමුළුවේදී අග්රාමාත්ය ආචාර්ය හරිනි අමරසූරිය මහත්මිය වෙත ‘Global Power Impact & Legacy Honour’ සම්මානය පිරිනැමීම විශේෂත්වයක් විය. ඇයගේ නායකත්වය සහ ඇතුළත් කරගත් පාලන ක්රමවේද ඇගයීමට ලක් කරමින් පිරිනැමුණු මෙම සම්මානය, ලන්ඩනයේ ශ්රී ලංකා මහ කොමසාරිස් කාර්යාලයේ නියෝජ්ය මහ කොමසාරිස්වරයා විසින් අග්රාමාත්යවරිය වෙනුවෙන් ලබා ගන්නා ලදී.
ජාත්යන්තර හවුල්කාරීත්වයන් ශක්තිමත් කිරීම සහ ගෝලීය ආර්ථික තීරණ ගැනීමේ ක්රියාවලියේදී කාන්තා නායකත්වය තවදුරටත් පුළුල් කිරීමේ අරමුණින් මෙම සමුළුව සංවිධානය කර තිබුණි.
