ජාතික පොසොන් පුණ්යෝත්සවයට සමගාමීව තන්තිරිමලේ රජමහා විහාරස්ථානයේ පැවැත්වෙන වාර්ෂික ආලෝක පූජාව සඳහා ජනාධිපති අනුර කුමාර දිසානායක මහතා සහභාගි විය.
පෙරේදා (29) පස්වරුවේ තන්තිරිමලේ රජමහා විහාරස්ථානය වෙත පැමිණි ජනාධිපතිවරයා ප්රථමයෙන් ආගමික වතාවත්වල නිරත විය. අනතුරුව විහාරස්ථානය ආලෝකවත් කරමින් ආලෝක පූජාවේ ආරම්භය සනිටුහන් කිරීම ජනාධිපතිවරයා අතින් සිදු කෙරිණි.
තන්තිරිමලේ රජමහා විහාරාධිපති, උතුරු නැඟෙනහිර දෙපළාතේ උප ප්රධාන සංඝනායක තන්තිරිමලේ චන්දරතන නාහිමිපාණන් වහන්සේගේ අනුශාසකත්වයෙන් පැවති මෙම උත්සවයට සමගාමීව මල් පහන් පෙරහරක් සහ බොදු බැති ගී ප්රසංගයක් ද පැවැත්විණි.
මෙම අවස්ථාව සඳහා බුද්ධශාසන, ආගමික හා සංස්කෘතික කටයුතු ඇමැති ආචාර්ය හිනිදුම සුනිල් සෙනෙවි, වෙළෙඳ, වාණිජ, ආහාර සුරක්ෂිතතා හා සමුපකාර සංවර්ධන ඇමැති වසන්ත සමරසිංහ, නිවාස, ඉදිකිරීම් හා ජලසම්පාදන ඇමැති වෛද්ය සුසිල් රණසිංහ සහ පාර්ලිමේන්තු මන්ත්රී සේන නානායක්කාර යන මහත්වරුන් ඇතුළු පිරිසක් එක්ව සිටියහ.
තවද පොලිස්පති නීතිඥ ප්රියන්ත වීරසූරිය, රාජ්ය නිලධාරීන්, ආරක්ෂක අංශ සාමාජිකයන් සහ විජය පුවත්පත් සමාගමේ සභාපති රංජිත් විජයවර්ධන මහතා ඇතුළු විශාල පිරිසක් මෙම ආගමික උත්සවයට එක්ව සිටියහ.
