රුපියල් විසි කෝටි දහඅට ලක්ෂ අනූ දහසක් වටිනා හෂීෂ් මත්ද්රව්ය තොගයක් සමඟ 27 හැවිරිදි කැනඩා ජාතික පුද්ගලයෙකු කටුනායක බණ්ඩාරනායක ජාත්යන්තර ගුවන් තොටුපොළේදී අද (26) අලුයම රේගු සහ අංශ නිලධාරීන් විසින් අත්අඩංගුවට ගෙන තිබේ. කැනඩාවේ ටොරොන්ටෝ නුවරින් අදාළ මත්ද්රව්ය තොගය මිලදී ගෙන කටාර් රාජ්යයේ දෝහා හරහා මෙරටට පැමිණ ඇති මෙම සැකකරු, කටාර් ගුවන් සේවයේ කිව්.ආර්.- 662 දරන ගුවන් යානයෙන් අද අලුයම 02.30ට පමණ කටුනායක ගුවන් තොටුපොළ වෙත ළඟා වී ඇති බව පරීක්ෂණ මඟින් අනාවරණය වී ඇත.
සැකකරු විසින් රැගෙන ආ ගමන් මලු දැඩි පරික්ෂාවට ලක් කිරීමේදී ඒවා තුළ සඟවා තිබූ හෂීෂ් මත්ද්රව්ය කිලෝ ග්රෑම් 20ක සහ ග්රෑම් 117ක අධික ප්රමාණයක් සොයා ගැනීමට නිලධාරීන් සමත්ව තිබේ. ජාත්යන්තර මත්ද්රව්ය ජාලයන් සමඟ සම්බන්ධතා පවත්වමින් ගුවන් මාර්ග ඔස්සේ මෙරටට විශාල පරිමාණයේ මත්ද්රව්ය රැගෙන එන ජාවාරම්කරුවන් ඉලක්ක කර ගනිමින් ගුවන් තොටුපොළ ආරක්ෂක සහ රේගු අංශ විසින් මෙම වැටලීම සිදු කර ඇත.
අත්අඩංගුවට ගත් විදේශීය ජාතිකයා සහ අදාළ හෂීෂ් මත්ද්රව්ය තොගය වැඩිදුර විමර්ශන කටයුතු සඳහා අදාළ අංශ වෙත භාර දී තිබේ. මෙරටට සිදුවන ජාත්යන්තර මත්ද්රව්ය ජාවාරම් මැඩලීම සඳහා ගුවන් තොටුපොළ ආනයන හා අපනයන පාලන මෙන්ම ආරක්ෂක ක්රමවේද දැඩි කර ඇති අතර, සැකකරුට එරෙහිව නීතිමය ක්රියාමාර්ග ගැනීමට කටයුතු කරමින් පවතී.
