English 
මත්ද්‍රව්‍ය ජාවාරම් වලට සම්බන්ධ හාල්මැස්සෝ නෙවෙයි තෝරු මෝරු ටික අල්ලන්න‘ – රංජිත් මද්දුම බණ්ඩාර
වැඩ බලන පොලිස්පති සහ පොලිස් ඇමැති රට තුළ ක්‍රියාත්මක කරන යුක්තියේ මෙහෙයුම මගින් අත්අඩංගුවට ගන්නේ මත්ද්‍රව්‍ය ජාවාරම්වලට සම්බන්ධ තෝරු මෝරු නොව පොඩි හාල්මැස්සන් බව පාර්ලිමේන්තු මන්ත්‍රී සමගි ජන බලවේගයේ මහලේකම් රංජිත් මද්දුම බණ්ඩාර මහතා පවසයි.
ඒ මහතා මේ බව සඳහන් කළේ, අද (11) විපක්ෂ නායක කාර්යාලයේ පැවති මාධ්‍ය හමුවකට සහභාගි වූ අවස්ථාවේදීය.
මත්ද්‍රව්‍ය ජාවාරම රටින් තුරන් කිරිමට නම් මත්ද්‍රව්‍ය ජාවාරමේ නිරත තෝරු මෝරු අත්අඩංගුවට ගැනීම සිදුකළ යුතු බවත් මත්ද්‍රව්‍ය වැටලීමේ මෙහෙයුම හරියාකාරව සිදුකරන ලෙස රජයෙන් ඉල්ලා සිටින බව හෙතෙම පැවසිය.
මාස 14 ක අවශ්‍ය සහල් මෙවර මහ කන්නයෙන් ලැබෙන බව කෘෂිකර්ම ඇමැතිවරයා සහ කෘෂිකර්ම දෙපාර්තමේන්තුව පවසන බවත් එවන් අවස්ථාවක රජය ඉන්දියාවෙන් කීරි සම්බා ගේන්න කටයුතු කරන බවත් මේ හේතුවෙන් දේශීය වී ගොවියා දැඩි අසිරුතාවයකට පත් වන බවත් මද්දුම බණ්ඩාර මහතා පැවැසීය.
වැඩිදුරටත් අදහස් දැක්වූ සමගි ජන බලවේගයේ මහලේකම් රංජිත් මද්දුම බණ්ඩාර මහතා ‘‘පුළුල් දේශපාලන සන්ධානයක් ගොඩනැගීම මේ වනවිට ආකාර දෙකකට ක්‍රියාත්මක වෙනවා. ආණ්ඩු පාර්ශ්වයේ සිටින මන්ත්‍රීවරු සෘජුවම සමගි ජන බලවේගය සමඟ එකතු වෙනවා. සන්ධාන ගතවීමට කැමැති ආණ්ඩු පාර්ශ්වයේ පිරිස් සහ පක්ෂ එකතු කරගෙන වෙනම සන්ධානයක් පිහිටුවලා රටේ තිබෙන ශක්තිමත්ම සන්ධානය පිහිටුවන්න කටයුතු කරනවා. ඉදිරි මාස කිහිපය ඇතුළත ඒ සන්ධානය ආරම්භ කරනවා. ඔක්තොම්බර් මාසයේ 17 වැනිදා වනවිට රටේ ජනාධිපතිවරයෙක් පත්විය යුතුයි. ජනාධිපතිවරණය ජය ගන්නේ සමගි ජනබලවේගයේ නායක සජිත් ප්‍රේමදාස මහතා. ඒක කාටවත් වෙනස් කරන්න බෑ. ජනාධිපතිවරණය අවසන් වුණ ගමන් මහ මැතිවරණය ප්‍රකාශයත් පත් කරනවා. 2025 ජනවාරි වෙනකොට මහමැතිවරණය පවත්වනවා.”මහලේකම් රංජිත් මද්දුම බණ්ඩාර මහතා වැඩිදුරටත් කියා සිටියේය.
