ඩිජිටල් ගෙවීම් ක්රමවේද පිළිබඳ මහජනතාව දැනුවත් කිරීම සහ ඒවා භාවිතයට පෙළඹවීම අරමුණු කරගනිමින් ශ්රී ලංකා මහ බැංකුව විසින් සංවිධානය කරනු ලබන දින දෙකක වැඩසටහනක් ජුනි මස 5 සහ 6 යන දිනවල ත්රිකුණාමලයේදී පැවැත්වේ. මෙම වැඩසටහන ත්රිකුණාමලය මධ්යම බස් නැවතුම්පොළ අසල පිහිටි වාහන නැවතුම්පොළේදී පෙරවරු 9.00 සිට පස්වරු 6.00 දක්වා පැවැත්වෙන අතර, ඒ සඳහා මහ බැංකු අධිපති ආචාර්ය පී. නන්දලාල් වීරසිංහ මහතා ඇතුළු මහ බැංකුවේ ජ්යෙෂ්ඨ නිලධාරීන් පිරිසක් සහභාගී වීමට නියමිතය.
ඩිජිටල් ගෙවීම් විසඳුම්වල පවතින වාසි, ආරක්ෂාව සහ පහසුව පිළිබඳව රජයේ නිලධාරීන්, ව්යාපාරික ප්රජාව සහ පොදු මහජනතාව දැනුවත් කිරීම මෙම වැඩසටහනේ අරමුණයි. මෙම අවස්ථාවට බැංකු, බැංකු නොවන මූල්ය ආයතන සහ අනෙකුත් අදාළ පාර්ශ්වයන් එක්වී විවිධ ඩිජිටල් මූල්ය සේවා සහ ගෙවීම් තාක්ෂණයන් ප්රදර්ශනය කිරීමට නියමිතය.
මහ බැංකුව විසින් ක්රියාත්මක කරන “ඩිජිටල් ගෙවීම් තුළින් අනාගතය හැඩගැන්වීම” (Shaping the Future Through Digital Payments) නම් ජාතික ව්යාපෘතියේ තවත් අදියරක් ලෙස මෙය ක්රියාත්මක වේ. මූල්ය ආයතන සහ කර්මාන්ත හවුල්කරුවන් සමඟ එක්ව ශ්රී ලංකාව තුළ වඩාත් ඇතුළත් සහ ඩිජිටල්කරණය වූ මූල්ය පද්ධතියක් ගොඩනැගීම මෙහි මූලික අපේක්ෂාවයි. ඩිජිටල් ගෙවීම් වේදිකා භාවිතය වේගවත් කිරීම සහ මුදල් රහිත ගනුදෙනු කෙරෙහි මහජන විශ්වාසය ශක්තිමත් කිරීම තුළින් ශ්රී ලංකාවේ ආර්ථිකය වඩාත් ඩිජිටල් ලෙස සම්බන්ධ කර ගැනීමට මහ බැංකුව බලාපොරොත්තු වේ.
