සිටිසන්ස් ඩිවලොප්මන්ට් බිස්නස් ෆිනෑන්ස් පීඑල්සී (CDB) ආයතනය විසින් ඉහළ ශුද්ධ වටිනාකමක් ඇති ගනුදෙනුකරුවන් ඉලක්ක කර ගනිමින් නවීන පෞද්ගලික ධන කළමනාකරණ සේවා යෝජනාවක් සහ සුවිශේෂී ‘World Mastercard Metal’ ක්‍රෙඩිට් කාඩ්පත නිල වශයෙන් එළිදක්වා තිබේ.
රෝයල් කලම්බු ගොල්ෆ් ක්ලබ් (RCGC) පරිශ්‍රයේදී පැවති විශේෂ උත්සවයකදී හඳුන්වා දුන් මෙම නව සුවිශේෂී මූල්‍ය සහ ජීවන රටා අත්දැකීම හරහා මෙරට මූල්‍ය හා ව්‍යාපාරික ක්ෂේත්‍රයේ නව සන්ධිස්ථානයක් සටහන් වන බව ආර්ථික විචාරකයෝ පෙන්වා දෙති. ගෝලීය මට්ටමේ පිළිගැනීමක් සහ සූක්ෂම ලෙස සකස් කරන ලද සංචාරක වරප්‍රසාද රැසක් සමඟින් සමන්විත මෙම අසමසම ‘White Metal’ ක්‍රෙඩිට් කාඩ්පත, මෙරට වරප්‍රසාදිත ගනුදෙනුකරුවන්ට ඉහළ මට්ටමේ මූල්‍ය ස්ථාවරත්වයක් සහ පහසුකම් ලබා දීම සඳහා විශේෂයෙන් නිර්මාණය කර ඇත.
මෙහි සමාරම්භක අවස්ථාව සනිටුහන් කරමින්, ප්‍රථම ක්‍රෙඩිට් කාඩ්පත CDB ආයතනයේ කළමනාකාර අධ්‍යක්ෂ සහ ප්‍රධාන විධායක නිලධාරී මහේෂ් නානායක්කාර මහතා විසින් RCGC නායක සහ ශ්‍රී ලංකා ක්‍රිකට් කණ්ඩායමේ හිටපු නායක මහේල ජයවර්ධන මහතා වෙතී පිළිගැන්වීම ද විශේෂ සිදුවීමක් විය. මෙරට ප්‍රමුඛ පෙළේ මූල්‍ය ආයතන සිය ඩිජිටල් සහ පුද්ගලික බැංකු සේවාවන් නවීන තාක්ෂණය හා ජාත්‍යන්තර ප්‍රමිතීන්ට අනුකූලව අඛණ්ඩව පුළුල් කරමින් සිටින පසුබිමක, මෙම නව හඳුන්වාදීම මඟින් මෙරට ආයෝජන සහ ව්‍යාපාරික ප්‍රජාවට ඉහළ වටිනාකමක් හිමිවනු ඇතැයි අපේක්ෂා කෙරේ.
ඉදිරියේදී මෙරට ධන කළමනාකරණ ක්ෂේත්‍රයේ තරගකාරීත්වය තවදුරටත් ඉහළ නංවමින්, ආයෝජක විශ්වාසය සහ මූල්‍ය විනය තහවුරු කිරීමට මෙමඟින් පුළුල් දායකත්වයක් ලැබෙනු ඇති අතර, පාරිභෝගික අවශ්‍යතා මත පදනම් වූ නවීන මූල්‍ය සේවාවන් රැසක් කරළියට ඒමට මෙය මඟපෙන්වීමක් වනු ඇත.
