නිවැරදි ටෙන්ඩර් ක්රමවේදයට අනුව අප්රේල් 20 වැනිදා වන විට ගල් අඟුරු නැව් 37ක් ලංකාවට ගෙන්වා ගත යුතුව තිබුණ ද, වත්මන් රජය විවිධ සමාගම්වලට වංචනික ලෙස ටෙන්ඩර් ලබාදීම නිසා සමස්ත ක්රියාවලියම අවුල් ජාලාවක් වී ඇතැයි හිටපු අමාත්ය පාඨලී චම්පික රණවක මහතා චෝදනා කරයි. නිසි කළමනාකරණයක් නොමැතිව ප්රමාද වී පැමිණි ගල් අඟුරු නැව් මේ වන විට පුත්තලම මුහුදේ කරකැවෙමින් පවතින බවත්, වාරකන් කාලය (මුහුද රළු වීම) ආරම්භ වී ඇති බැවින් එම ගල් අඟුරු තොග බා ගැනීමට නොහැකිව දැවැන්ත මූල්ය අලාභයක් සිදු වෙමින් පවතින බවත් ඔහු පෙන්වා දුන්නේය. මෙම අදූරදර්ශී තීරණ නිසා සිදුවන සමස්ත පාඩුව තෙල් සංස්ථාව සහ විදුලිබල මණ්ඩලය හරහා පාරිභෝගිකයා මතත්, මහා භාණ්ධාගාරය හරහා බදු ගෙවන්නන් මතත් පටවා ඇතැයි රණවක මහතා මෙහිදී දැඩිව අවධාරණය කළේය.
ඩීසල් ලීටරයක සැබෑ පිරිවැය රුපියල් 720ක් බව ජනාධිපතිවරයා පවසන ප්රකාශය ප්රශ්න කළ හිටපු අමාත්යවරයා, සිංගප්පූරුවේ ඩීසල් ලීටරයක් රුපියල් 320ක් වෙද්දී ඉතිරි රුපියල් 420ක මුදල ගියේ කාගේ සාක්කුවටද නැතහොත් එය පැලවත්ත (ජවිපෙ මූලස්ථානය) වෙත ගියේද යන්න ජනාධිපතිවරයා රටට පැහැදිලි කළ යුතු බව කියා සිටියේය. තමන්ට එරෙහිව ගල් අඟුරු මඩ ප්රචාර යැවීමට ජනතා විමුක්ති පෙරමුණේ ප්රධාන ලේකම් ටිල්වින් සිල්වා ඇතුළු පිරිස උත්සාහ කරන බව පෙන්වා දුන් ඔහු, ගල් අඟුරු වංචා සෙවීමට පත්කර ඇති කමිටුවේ ගරුත්වය රැකගැනීමට නම් වහාම ටිල්වින් සිල්වාව එම කොමිසම හමුවට කැඳවා විමර්ශන කර නීතිය ක්රියාත්මක කළ යුතු බව ඉල්ලා සිටියේය. 2012 වසරේදී තමන් අමාත්යවරයාව සිටි සමයේ වාරකන් මැද පැමිණි ගල් අඟුරු නැව් තුනක් සඳහා අමාත්යාංශ ලේකම්වරයා නීති විරෝධී ලෙස මුදල් ගෙවීමට ගිය අවස්ථාවේදී, තමන් ඊට දැඩිව විරුද්ධ වී කිසිදු බාල ගල් අඟුරක් බෑමට ඉඩ නොදී, වංචාව හෙළිදරව් කරමින් අමාත්ය ධුරයෙන් පවා ඉල්ලා අස්වූ අතීතය මෙහිදී සිහිපත් කළේය.
