යෝජිත 22 වන ආණ්ඩුක්රම ව්යවස්ථා සංශෝධනයට එරෙහිව ඇතැම් පාර්ශ්වයන් හඬ නගන්නේ ක්රිෂ් නඩුව, සිරිලිය ගිණුම සහ තාජුඩීන් ඝාතනය වැනි අතීතයේ සිදුවූ බරපතළ අපරාධ සහ වංචා සම්බන්ධයෙන් නඩු වැටෙතැයි පවතින බිය නිසා බව කළුතර දිස්ත්රික් පාර්ලිමේන්තු මන්ත්රී චන්දිම හෙට්ටිආරච්චි මහතා පවසයි. හන්තානේ ඉඩම් ගැටලු සහ විවිධ ආයතනවලට පොහොර ලබාදීමේදී සිදුවූ දූෂණ සම්බන්ධයෙන් ද ඉදිරියේදී නඩු කඩිනමින් විභාග වී තමන්ට එරෙහිව චෝදනා එල්ල වේ යැයි එම පිරිස් දැඩි බියකින් පසුවන බව හෙතෙම ජන හමුවකදී පෙන්වා දුන්නේය.
රටේ අධිකරණ පද්ධතිය තුළ ගොඩගැසී ඇති නඩු ලක්ෂ 11ක පමණ තදබදය මඟහරවා ගැනීම සඳහා රජය පුළුල් ප්රතිසංස්කරණ රැසක් හඳුන්වා දී ඇති අතර, ඒ යටතේ අධිකරණ පද්ධතියට අලුතින් 4,400ක පිරිසක් බඳවා ගැනීමටත් පැරණි කඩදාසි ක්රමය වෙනුවට පද්ධතිය ඩිජිටල්කරණය කිරීමටත් කටයුතු කරමින් සිටින බව මන්ත්රීවරයා සඳහන් කළේය. එපමණක් නොව, අමාත්යවරුන් පරිහරණය කළ සුඛෝපභෝගී නිල නිවාස අධිකරණ කටයුතු සඳහා ලබා දීමට රජය තීරණය කර ඇති අතර, විනිසුරුවරුන්ගේ විශ්රාම වයස වසර දෙකකින් දීර්ඝ කරනු ලබන්නේ පළපුරුදු විනිසුරුවරුන්ගේ අත්දැකීම් අධිකරණ පද්ධතියේ ප්රගතිය සඳහා තවදුරටත් රඳවා ගැනීමේ අරමුණින් බව ඔහු වැඩිදුරටත් පෙන්වා දුන්නේය.
අතීතයේදී මෙන් හිතවතුන් අගවිනිසුරු ධුරවලට පත් කිරීම හෝ දේශපාලන උවමනාවන් මත විනිසුරුවරුන් ධුරවලින් ඉවත් කිරීම වැනි ප්රජාතන්ත්ර විරෝධී ක්රියා වත්මන් රජය සිදු නොකරන බවත්, වෘත්තීය මට්ටමේ විනිසුරුවරුන්ගේ ස්වාධීනත්වය සුරක්ෂිත කිරීමට රජය සම්පූර්ණයෙන් කැපවී සිටින බවත් හෙට්ටිආරච්චි මහතා අවධාරණය කළේය. රටේ නීතියේ ආධිපත්යය තහවුරු කෙරෙන මෙම ක්රියාමාත්ෂයන් හරහා අධිකරණ ක්රියාවලිය වඩාත් විනිවිදභාවයකින් යුතුව ඉදිරියට ගෙන යාමටත්, වගකිවයුතු පාර්ශ්වයන්ට එරෙහිව නීතියේ රැහැන දැඩි කිරීමටත් ඉදිරියේදී පුළුල් අවකාශයක් සැලසෙනු ඇතැයි අපේක්ෂා කෙරේ.
