අධිකරණයේ ස්වාධීනත්වයට සහ විනිශ්චයකාරවරුන්ගේ ගෞරවයට මරු පහරක් එල්ල වන ආකාරයෙන් වර්තමාන රජය කටයුතු කරමින් සිටින බව සමගි ජන බලවේගයේ හිටපු අමාත්ය නීතිඥ චන්දිම වීරක්කොඩි මහතා පවසයි. සමගි ජන බලවේග ප්රධාන කාර්යාලයේ පැවැති මාධ්ය හමුවකට එක්වෙමින් ඒ මහතා මේ බව සඳහන් කළේය.
විනිශ්චයකාරවරුන්ගේ සේවා කාලය දීර්ඝ කිරීම සඳහා ආණ්ඩුව ගෙන ඇති තීරණය දැඩි ලෙස විවේචනය කළ හිටපු අමාත්යවරයා, මෙවැනි සංශෝධන සඳහා තුනෙන් දෙකක පාර්ලිමේන්තු අනුමැතිය සහ ජනමත විචාරණයක් අවශ්ය වන බව පෙන්වා දුන්නේය. නඩු කටයුතු කඩිනම් කිරීම සඳහා යැයි පවසමින් ඉහළ අධිකරණවල විනිසුරුවරුන්ගේ සේවා කාලය දීර්ඝ කිරීමට උත්සාහ කළද, සැබැවින්ම වැඩිම නඩු ප්රමාණයක් පවතින්නේ මහේස්ත්රාත් සහ දිස්ත්රික් අධිකරණවල බවත්, එම උසාවිවලට අවශ්ය පහසුකම් ලබා දී නඩු ඉක්මන් කිරීමට කටයුතු කළ යුතු බවත් හෙතෙම සඳහන් කළේය.
ජනතාව හෝ විනිසුරුවරුන් කිසිවකු එවැනි සේවා කාල දීර්ඝ කිරීම් ඉල්ලා නොමැති බවත්, අගවිනිසුරුවරුන් 10 දෙනෙකුගේ අත්සනින් යුතුව ලිපියක් යොමු කරමින් මෙგැනි ව්යවස්ථා සංශෝධනවලට විරෝධය පළ කර ඇති බවත් ඔහු පැවසීය. එබැවින්, ජනතා මතයට සවන්දී අධිකරණයේ ස්වාධීනත්වය සහ විනිසුරුවරුන්ගේ ගෞරවය ආරක්ෂා කරන ලෙස සමගි ජන බලවේගය වෙනුවෙන් ඒ මහතා රජයෙන් දැඩි ලෙස ඉල්ලා සිටියේය.
