පයාගල සහ මතුගම ඇතුළු තදාසන්න ප්රදේශවල ව්යාපාරිකයන් ඉලක්ක කරගනිමින් මහා පරිමාණයෙන් ක්රියාත්මක වූ සංවිධානාත්මක කප්පම් ගැනීමේ ජාවාරමක සුලමුල අනාවරණය වී තිබේ. දිවයිනේ ලියාපදිංචි අපරාධකරුවකු වන ‘චාටර් බට්ටා’ යන අන්වර්ථ නාමයෙන් හඳුන්වන 36 හැවිරිදි දමිත් සමන්ත නැමැත්තා කේන්ද්රකර ගනිමින් මෙම ජාවාරම ක්රියාත්මක වී ඇත.ප්රබල සංවිධානාත්මක අපරාධ කල්ලි නායකයකු වන ‘කළුතර නවීන්’ නැමැත්තාගේ සමීපතම ගෝලයෙකු ලෙස පෙනී සිටිමින් මොහු කළුතර, මතුගම, අළුත්ගම සහ බේරුවල ප්රදේශවල ව්යාපාරිකයන් බිය ගන්වා කප්පම් ඉල්ලා තිබේ. කෙසේ වෙතත්, කළුතර නවීන්ගේ කිසිදු දැනුවත්භාවයකින් තොරව, ඔහුගේ නම පමණක් සන්නාමයක් ලෙස භාවිත කරමින් ‘චාටර් බට්ටා’ තනිව මෙම කප්පම් ගැනීම් මෙහෙයවා ඇති බව අනාවරණය වී ඇත.මීට පෙර මත්ද්රව්ය සහ විවිධ සොරකම් සම්බන්ධයෙන් වරදකරු වී සිරදඬුවම් විඳ ඇති මොහු, බන්ධනාගාරයෙන් නිදහස් වීමෙන් පසුද සිය සාපරාධී ජීවිතය අත්හැර නැත. වෙසක් පොහෝ දින කළුතර බෝධිය අසලින් සොරකම් කරන ලද යතුරුපැදියක් වෙනත් අංක තහඩුවක් යොදා මෙම කප්පම් ජාවාරම සඳහා ඔහු භාවිත කර තිබේ.කළුතර කොට්ඨාස අපරාධ විමර්ශන අංශය විසින් පයාගල සාගර මාවත අසලදී සිදු කළ විශේෂ වැටලීමකදී චාටර් බට්ටා ඇතුළු සැකකරුවන් තිදෙනකු සහ යතුරුපැදි අලුත්වැඩියා කරන්නෙකු හෙරොයින් මත්ද්රව්ය හා සොරකම් කරන ලද යතුරුපැදිය සමඟ අත්අඩංගුවට ගෙන කළුතර මහෙස්ත්රාත් අධිකරණයට ඉදිරිපත් කර ඇත. කෙසේ වෙතත්, මෙම අපරාධ පිටුපස ඇතැම් දූෂිත පොලිස් නිලධාරීන්ගේද සෘජු අනුග්රහය ලැබී ඇති බවට තොරතුරු වාර්තා වන අතර, සිද්ධිය සම්බන්ධයෙන් වැඩිදුර විමර්ශන ක්රියාත්මක වේ.
