චීනයේ මස් කඩයකට විකිණීම සඳහා සොරුන් පිරිසක් විසින් පැහැරගෙන ගිය සුනඛයන් හත් දෙනෙකු ඉතා සූක්ෂ්ම ලෙස එම ස්ථානයෙන් පලා ගොස්, කිලෝමීටර් 17ක පමණ දුරක් ගෙවා නැවත සිය නිවෙස් බලා පැමිණීමේ පුවතක් මේ වන විට ජාත්යන්තර මාධ්ය අවධානයට යොමුව තිබේ. මෙම සුනඛ කණ්ඩායම අතර කෝර්ගි (Corgi) වර්ගයේ සුනඛයෙකු පෙරමුණ ගෙන සිටි අතර, ජර්මන් ෂෙපර්ඩ් (German Shepherd) ඇතුළු තවත් සුනඛයන් පිරිසක් ඉතා විනයගරුකව මහා මාර්ගය අසලින් ගමන් කරන අයුරු දැක්වෙන වීඩියෝවක් සමාජ මාධ්ය තුළ දැඩි ලෙස සංසරණය වෙමින් පවතී.
චීනයේ චැංචුන් ප්රදේශයේ කාර්යබහුල මහා මාර්ගයක් අසල මෙම සුනඛයන් පිරිස ගමන් කරනු දුටු ලූ නැමැති පුද්ගලයෙකු විසින් මෙම දර්ශන පටිගත කර තිබේ. එහිදී ඔහු මෙම සතුන්ව ආරක්ෂිත ස්ථානයකට යොමු කිරීමට උත්සාහ කළද, ඔවුන් ඉතා අධිෂ්ඨානශීලීව තමන් පැමිණි මාර්ගයේම ඉදිරියට ගමන් කර ඇත. අනතුරුව ඔහු මෙම දර්ශන චීනයේ ප්රකට ‘ඩොයින්’ (Douyin) සමාජ මාධ්ය ජාලයට එක් කරමින්, මෙම සතුන්ට උපකාර කරන ලෙස බලධාරීන්ගෙන් ඉල්ලීමක් ද කර තිබේ.
මෙම සිදුවීම වාර්තා කළ පුද්ගලයා ප්රාදේශීය මාධ්ය වෙත පවසා ඇත්තේ මෙම සුනඛයන් පිරිස කිසිසේත්ම අතරමං වූ සතුන් ලෙස නොපෙනුණු බවත්, ඔවුන් ඉතා සමීප සහෝදර පිරිසක් මෙන් එක්ව ගමන් කළ ආකාරය පුදුම සහගත බවත්ය. සිනමා පටයක දර්ශනයක් බඳු වූ මෙම සිදුවීමත් සමඟ සතුන්ගේ බුද්ධිමත්භාවය සහ ඔවුන්ගේ ලැදියාව පිළිබඳව ලොව පුරා සත්ව ලෝලීන්ගේ ඉහළ පැසසුමක් හිමි වෙමින් පවතී.
