ශ්රී ලංකාවට ආවේණික සහ මෙරට වන සත්ව හා වෘක්ෂලතා ආරක්ෂක ආඥා පනත යටතේ දැඩි ලෙස ආරක්ෂිත ශාක විශේෂයක් වන ‘කොතල හිඹුටු’ (Salacia reticulata) තොගයක් නීති විරෝධී ලෙස මෙරටින් බැහැර කිරීමට උත්සාහ කළ විදේශීය ජාතිකයෙකු අද (31) උදෑසන කටුනායක බණ්ඩාරනායක ජාත්යන්තර ගුවන් තොටුපළේදී රේගු නිලධාරීන් විසින් අත්අඩංගුවට ගෙන තිබේ.
අත්අඩංගුවට ගෙන ඇත්තේ ශ්රී ලංකාවේ සංචාරයක නිරත වී ආපසු යාමට පැමිණි 46 හැවිරිදි චීන ජාතිකයෙකි. ඔහු විසින් කොතල හිඹුටු ශාක කොටස් කුඩා කැබලිවලට කපා, කිලෝග්රෑම් 21ක පමණ බරකින් යුත් එම තොගය ලෝක ප්රසිද්ධ ශ්රී ලාංකික තේ සන්නාමයක ඇසුරුම්වල සඟවා තිබියදී රේගු නිලධාරීන්ට හසු වී ඇත. ශ්රී ලංකාවේ නීතියට අනුව කොතල හිඹුටු ශාකය මෙරටින් අපනයනය කිරීම සපුරා තහනම් වේ. කටුනායක ගුවන් තොටුපළ රේගු නිලධාරීන් සහ රේගු ජෛව විවිධත්ව, සංස්කෘතික හා ජාතික උරුමයන් සුරැකීමේ ඒකකය එක්ව මේ පිළිබඳව වැඩිදුර විමර්ශන සිදු කරයි.
