අපරාධ පරීක්ෂණ දෙපාර්තමේන්තුවේ (CID) සයිබර් අපරාධ අංශයේ ස්ථානාධිපතිවරයෙකු ඇතුළු පිරිසක් විදේශිකයන්ගෙන් අල්ලස් ගැනීමේ සිද්ධියකට කොටුවීම සහ තවත් පිරිසක් නිදන් හැරීමේ ජාවාරමකට හසුවීම ඇතුළු CIDය තුළ සිදුව ඇති බරපතල අපරාධ රැල්ලක් හේතුවෙන් එම දෙපාර්තමේන්තුව මේ වන විට දැඩි පරිපාලන අර්බුදයකට ලක්ව ඇති බව ප්රකට දේශපාලන විචාරක කීර්ති රත්නායක මහතා විශේෂ අනාවරණයන් කිහිපයක් සිදුකරමින් ප්රකාශ කර තිබේ. වැලිකඩ පොලිස් ස්ථානාධිපතිවරයා අල්ලස් ගනිමින් කොටුවූ සිදුවීම මෙන් CIDයේ සිදුවන මෙම දූෂණ ක්රියා ප්රසිද්ධියට පත් නොවුණ ද, පොලිස්පතිවරයාගේ (IGP) සෘජු මැදිහත්වීම මත මේ වන විට CIDයේ සිදුවූ අපරාධ සම්බන්ධයෙන් රහසිගත විමර්ශනයක් ක්රියාත්මක වන බවත්, එහි මූලික පියවරක් ලෙස සයිබර් අපරාධ අංශයේ ස්ථානාධිපතිවරයාව වහාම ක්රියාත්මක වන පරිදි තනතුරෙන් ඉවත් කර ඇති බවත් ඔහු පෙන්වා දෙයි.
මේ අතර, පාස්කු ඉරිදා බෝම්බ ප්රහාරය සම්බන්ධයෙන් අත්අඩංගුවට ගෙන සිටින හිටපු රාජ්ය බුද්ධි සේවයේ (SIS) ප්රධානී මේජර් ජනරාල් සුරේෂ් සලේ මහතාට එරෙහිව දෙවන වරටත් රැඳවුම් නියෝග (Detention Orders) නිකුත් කිරීමට සිදුවීම වත්මන් ආණ්ඩුව දේශපාලනික වශයෙන් දැඩි අවාසිදායක තත්ත්වයකට ඇද දමා ඇති බව රත්නායක මහතා සඳහන් කරයි. සැබැවින්ම සලේ මහතාට එරෙහි විමර්ශන කටයුතු මාස දෙකක් වැනි කෙටි කාලයක් තුළ අවසන් කර නීතිමය වශයෙන් චෝදනා ගොනු කිරීමට හැකියාව තිබුණ ද, CIDය එම කාර්යය නිසි පරිදි ඉටු කිරීමට අපොහොසත් වී තිබේ. මෙම විමර්ශන අසාර්ථකත්වය හේතුවෙන් වත්මන් ජනාධිපතිවරයා අපරාධ පරීක්ෂණ දෙපාර්තමේන්තුවේ අධ්යක්ෂවරයාගේ (Director CID) ක්රියාකලාපය පිළිබඳව දැඩි අසතුටකින් පසුවන බව ද වාර්තා වේ.
පසුගිය සතියේදී ජනාධිපතිවරයා විසින් CIDයේ සමස්ත කටයුතු සම්බන්ධයෙන් විශ්රාමික නියෝජ්ය පොලිස්පති සහ වත්මන් විශේෂ උපදේශක ශානි අබේසේකර මහතා වෙත දැඩි දොස්මුරයක් තබා ඇති බව ද කීර්ති රත්නායක මහතා සිය වාර්තාව මඟින් ප්රකාශ කර තිබේ. ඔහු පෙන්වා දෙන්නේ මේ වන විට ශානි අබේසේකර මහතාගේ ප්රධාන ආරක්ෂකයන් ලෙස කටයුතු කරන්නේ ඔහුව ජනාධිපතිවරයා වෙත කැඳවාගෙන ඒමට මැදිහත් වූ මෙරට කතෝලික සභාව සහ ප්රසිද්ධ නීතීඥ රියැන්සි අර්සකුලරත්න මහතා බවයි. මීට සමගාමීව, ශානි අබේසේකර මහතා පසුගියදා හිඟ වැටුප් ද සහිතව නියෝජ්ය පොලිස්පති (DIG) තනතුරට උසස් කරනු ලැබුවේ ජනාධිපතිවරයාගේ සෘජු අනුමැතියකින් නොව, පරිපාලන විනිශ්චය සභාව (Administrative Appeals Tribunal) මඟින් ලබාදුන් නීතිමය තීන්දුවකට අනුව සිදුවූ පරිපාලනමය ක්රියාවලියකින් පමණක් බව ද එම වාර්තාවේ වැඩිදුරටත් සඳහන් වේ.
