ශ්රී ලංකාවේ සංචාරක සහ ආගන්තුක සත්කාර ක්ෂේත්රයේ නව පෙරළියක් ඇති කරමින් “City of Dreams Sri Lanka” දකුණු ආසියාවේ ප්රථම පූර්ණ ඒකාබද්ධ සුඛෝපභෝගී රිසෝට් සංකීර්ණය ලෙස සිය මෙහෙයුම් තවදුරටත් ශක්තිමත් කරමින් සිටියි. Melco Resorts & Entertainment සහ ජෝන් කීල්ස් හෝල්ඩිංග්ස් පීඑල්සී (JKH) අතර ඇති වූ උපායමාර්ගික හවුල්කාරිත්වය හරහා ඉදිවූ මෙම සුවිශේෂී ව්යාපෘතිය, කොළඹ නගරයට සුඛෝපභෝගී ජීවන රටාවක් සහ විනෝදාස්වාදයේ අලුත් මානයක් හඳුන්වා දී තිබේ. මෙහි ඇති විශේෂත්වය වන්නේ ලෝක මට්ටමේ ප්රමිතියෙන් යුත් Nüwa සුඛෝපභෝගී හෝටලය සහ Cinnamon Life සජීවී ජීවන රටා හෝටලය යන අත්දැකීම් ද්විත්වයම එකම පරිශ්රයක් තුළ අත්විඳීමට සංචාරකයන්ට අවස්ථාව ලැබීමයි.
අමෙරිකානු ඩොලර් බිලියන 1.3ක දැවැන්ත ආයෝජනයක් සහිතව වර්ග අඩි මිලියන 4.5ක වපසරියක පැතිරී ඇති මෙම ව්යාපෘතිය ශ්රී ලංකාවේ සිදුවූ විශාලතම පෞද්ගලික ආයෝජනය ලෙස ඉතිහාසයට එක් වේ. හුදු හෝටල් සංකීර්ණයකට එහා ගිය මෙම සංවර්ධනය හරහා කොළඹ නගරය ගෝලීය වශයෙන් වඩාත් තරඟකාරී සහ ඉහළ වටිනාකමකින් යුත් සංචාරක ගමනාන්තයක් බවට පත්වනු ඇතැයි අපේක්ෂා කෙරේ. මෙහි ඇති ඒකාබද්ධ රිසෝට් සංකල්පය (Integrated Resort Concept) හරහා ප්රමුඛ පෙළේ නවාතැන් පහසුකම්වලට අමතරව විනෝදාස්වාදය, සිල්ලර වෙළඳාම, සෞඛ්ය සම්පන්න ජීවන රටා අංග සහ මහා පරිමාණ උත්සව පැවැත්වීමේ හැකියාව එකම වහලක් යටට ගෙන එනු ලබයි.
නවාතැන් පහසුකම් සලකා බැලීමේදී Nüwa හෝටලය කාමර සහ සුඛෝපභෝගී නිවාස 113කින් සමන්විත වන අතර එය ඉතා පෞද්ගලික මට්ටමේ ඉහළම සැපපහසුවක් පාරිභෝගිකයාට ලබා දෙයි. ඊට අමතරව ඉන්දියන් සාගරය සහ කොළඹ අහස දර්ශනය වන පරිදි නිර්මාණය කර ඇති Cinnamon Life හෝටලය කාමර සහ නිවාස 687කින් සමන්විතව වඩාත් සජීවී සහ නවීන නගරයක අත්දැකීමක් සංචාරකයන් වෙත සමීප කරයි. මෙම දැවැන්ත ව්යාපෘතිය කොළඹ නගරයේ අනාගත දැක්ම සහ ගෝලීය සංචාරක ආකර්ෂණය දිනා ගැනීම උදෙසා තැබූ තීරණාත්මක පියවරක් ලෙස හඳුන්වා දිය හැකිය.
