කොළඹ සිට කතරගම බලා ධාවනය වූ මගී ප්රවාහන සුඛෝපභෝගී බස් රථයක් දක්ෂිණ අධිවේගී මාර්ගයේ වැලිපැන්න අන්තර් හුවමාරුව ආසන්නයේදී අද (27) පස්වරුවේ හදිසි ගිනි ගැනීමකට ලක්ව තිබේ. පස්වරු 1.55 ට පමණ හටගත් මෙම ගින්නෙන් බස් රථයට දැඩි හානි සිදු වී ඇති අතර එය සම්පූර්ණයෙන්ම පාහේ විනාශ වී ඇති බව වාර්තා වේ.
ගින්න හටගන්නා අවස්ථාවේදී බස් රථය තුළ මගීන් පිරිසක් සිටියද, ඔවුන් සියලු දෙනා නිරුපද්රිතව ඉවත් කර ගැනීමට හැකි වූ බැවින් කිසිදු ජීවිත හානියක් හෝ තුවාල වීමක් සිදු වී නොමැති බව පොලීසිය තහවුරු කරයි. ගින්න මැඩපැවැත්වීම සඳහා අධිවේගී මාර්ග නඩත්තු ඒකකයේ ගිනි නිවන රථ සහ නිලධාරීන් කඩිනමින් මැදිහත් වූහ.
මෙම ගින්නට හේතුව මෙතෙක් අනාවරණය වී නොමැති අතර, කාර්මික දෝෂයක් නිසා ගින්න හටගත්තේ ද යන්න පිළිබඳව වැලිපැන්න අධිවේගී මාර්ග පොලීසිය වැඩිදුර විමර්ශන පවත්වයි. සිද්ධිය හේතුවෙන් අධිවේගී මාර්ගයේ එම කොටසේ ගමනාගමනයට සුළු වේලාවකට බාධා එල්ල වුවද, මේ වන විට රථ වාහන ධාවනය යථා තත්ත්වයට පත් කර තිබේ.
