කොළඹ වරායේ ඉදිකිරීමට සැලසුම් කර තිබූ අමෙරිකානු ඩොලර් මිලියන 392ක දකුණු ආසියානු වාණිජ හා සැපයුම් මධ්‍යස්ථාන (SACLH) ව්‍යාපෘතිය අවසන් කිරීමට එහි හවුල්කරුවන් තීරණය කර තිබේ.
චීනයේ **China Merchants Port Holdings** සමාගම ඔක්තෝබර් 15 වැනිදා හොංකොං කොටස් වෙළෙඳපොළ වෙත ඉදිරිපත් කළ නිවේදනයක් මඟින් ව්‍යාපෘතිය අවසන් කිරීම තහවුරු කර ඇත. ව්‍යාපෘතියේ ක්‍රියාත්මක කිරීමේ පරිසරයේ සහ කාලසටහනේ සිදුවූ වෙනස්කම් මෙන්ම හවුල්කරුවන්ගේ වාණිජමය සලකා බැලීම් ද මෙම තීරණයට හේතු ලෙස දක්වා තිබේ.
ව්‍යාපෘතිය අවසන් කිරීමේ එකඟතාව අනුව, ශ්‍රී ලංකා වරාය අධිකාරිය විසින් SACLH ව්‍යාපෘති සමාගම වෙත අමෙරිකානු ඩොලර් මිලියන 21.905ක මුදලක් ගෙවීමට නියමිතය. අවසන් කිරීමේ ගිවිසුම අත්සන් කළ දින සිට දින 30ක් ඇතුළත මෙම ගෙවීම සිදුකළ යුතු බව වාර්තා වේ.
චීන සමාගමේ අනුබද්ධ ආයතනය විසින් ව්‍යාපෘතියට මුලින් ආයෝජනය කර තිබූ ඩොලර් මිලියන 26ක මුදලින් අදාළ බදු සහ ප්‍රමාද ගාස්තු අඩු කිරීමෙන් පසු ඉතිරිවන මුදල මෙම ගෙවීමට අදාළ වේ. ව්‍යාපෘති සමාගම සතුව ඇති බෙදාහැරිය හැකි මුදල් ද සමඟ අවසන් පියවීම් සිදුකිරීමට නියමිතය.
මෙම ව්‍යාපෘතියේ කොටස්වලින් 70%ක් China Merchants Port Holdings සමාගමේ අනුබද්ධ ආයතනය සතු වූ අතර, ශ්‍රී ලංකා වරාය අධිකාරියට සහ මෙරට Access Engineering PLC සමාගමට 15% බැගින් කොටස් හිමිව තිබිණි. ඒ අනුව අවසන් පියවීම් කොටස් හිමිකාරීත්වයේ අනුපාතයට අනුව බෙදාහැරීමට නියමිතය.
වසර 50ක ගොඩනැගීමේ, මෙහෙයුම් සහ පැවරීමේ ගිවිසුමක් යටතේ ක්‍රියාත්මක කිරීමට සැලසුම් කර තිබූ මෙම ව්‍යාපෘතිය සඳහා 2023 වසරේදී උපායමාර්ගික සංවර්ධන ව්‍යාපෘති තත්ත්වය ද ලබාදී තිබිණි. එහෙත් ව්‍යාපෘතිය ඉදිරියට ගෙන යාමට නොහැකි වීම හේතුවෙන් හවුල්කරුවන් එය අවසන් කිරීමට එකඟ වී තිබේ.
