දකුණු කොළඹ ශික්ෂණ රෝහලේ ස්ථාපිත කළ අතිනවීන හෘද කැතීටරීකරණ රසායනාගාර ඒකකය ඇතුළු වෛද්ය තාක්ෂණික පහසුකම් පෙළක් හෙට (30) දින ජනතා අයිතියට පත් කිරීමට නියමිතව ඇත්තේ මෙරට හෘද රෝග ප්රතිකාර ක්ෂේත්රයේ නව පිම්මක් සනිටුහන් කරමිනි. සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ ප්රධානත්වයෙන් විවෘත කෙරෙන මෙම නව ඒකක හරහා හෘද කැතීටරීකරණ සේවා මෙන්ම ඩිජිටල් ඇන්ජියෝග්රැෆි සහ වකුගඩු ආශ්රිත ලිතොට්රිප්සි ප්රතිකාර සේවාවන් සඳහා ජනතාවට වඩාත් කාර්යක්ෂම ප්රවේශයක් හිමිවනු ඇත.
මෙරට රජයේ රෝහල් පද්ධතිය තුළ හෘද හා රුධිර නාල ආශ්රිත රෝගීන් සඳහා පවතින දිගුකාලීන පොරොත්තු ලේඛන අවම කිරීමේ ජාතික අරමුණ පෙරදැරිව මෙම ව්යාපෘතිය ක්රියාවට නංවා තිබේ. කෘත්රිම බුද්ධිය මත පදනම් වූ තත්කාලීන රූපකරණ තාක්ෂණයෙන් සහ අවම විකිරණ මාත්රාවකින් ඉහළ ගුණාත්මක ප්රතිඵල ලබා ගැනීමේ හැකියාවෙන් මෙම පද්ධති සමන්විත වන අතර, මෙය සාමාන්ය ජනතාව වෙත ගුණාත්මක වෛද්ය ප්රතිකාර සමීප කිරීමේ රජයේ ප්රමුඛ පියවරක් ලෙස සැලකේ.
පසුගිය 27 වනදා යාපනය ශික්ෂණ රෝහලේ කැත් ලැබ් ඒකකය විවෘත කිරීමෙන් ඇරඹි මෙම වැඩසටහන යටතේ මේ සතිය තුළ පමණක් නවීන කැත් ලැබ් ඒකක 04ක් ජාතික රෝහල් පද්ධතියට එක් කිරීමට සැලසුම් කර ඇත. කළුබෝවිල ශික්ෂණ රෝහලෙන් පසු කොළඹ ජාතික රෝහලේ ඒකක දෙකක්ද කඩිනමින් රෝගී සේවාව සඳහා විවෘත කිරීමට නියමිතව ඇති අතර, මෙම පියවර හරහා මෙරට හෘද රෝග වෛද්ය ක්ෂේත්රයේ තාක්ෂණික දියුණුව සහ ප්රතිකාර පහසුකම්වල ගුණාත්මකභාවය ඉදිරි කාලයේදී තවදුරටත් ශක්තිමත් වනු ඇත.
