ශ්රී ලංකාවේ ප්රමුඛතම බැංකුවක් වන කොමර්ෂල් බැංකුව, සිය පාරිභෝගිකයින්ට තම PayPal ගිණුම්වල ඇති විදේශීය ආදායම් සෘජුවම ‘ComBank Digital’ හරහා බැංකු ගිණුම් වෙත මාරු කර ගැනීමේ නවීන පහසුකම හඳුන්වා දී තිබේ. මෙමඟින් ශ්රී ලංකාවේ නිදහස් සේවකයින්ට (freelancers), ඩිජිටල් ව්යවසායකයින්ට සහ අපනයනකරුවන්ට තම ගෝලීය ඩිජිටල් ඉපැයීම් ඉතා ආරක්ෂිතව සහ පහසුවෙන් මෙරට බැංකු පද්ධතියට එක්කර ගැනීමට අවස්ථාව හිමි වේ.
මෙම තාක්ෂණික ඒකාබද්ධ කිරීම ‘ComBank Digital’ වේදිකාව තුළ පවතින ආරක්ෂිත, ස්වයං-සේවා විද්යුත් තැපැල් (email-based) සමමුහුර්තකරණ යාන්ත්රණයක් හරහා ක්රියාත්මක වේ. දැනටමත් PayPal භාවිතා කරන පාරිභෝගිකයින්ට තම PayPal ගිණුම කොමර්ෂල් බැංකු ගිණුම සමඟ ඉතා පහසුවෙන් සම්බන්ධ කළ හැකි අතර, ඉන්පසු සිය ගිණුමේ ශේෂය බැංකු යෙදුම හරහා නිරීක්ෂණය කර මුදල් මාරු කර ගත හැකිය.
මෙම නව පියවර පිළිබඳව අදහස් දක්වමින් කොමර්ෂල් බැංකුවේ කළමනාකාර අධ්යක්ෂ සහ ප්රධාන විධායක නිලධාරී සනත් මනතුංග මහතා පැවසුවේ, ශ්රී ලංකාවේ ඩිජිටල් වෘත්තිකයින්ට වසර ගණනාවක් පුරා තම විදේශීය ඉපැයීම් නීත්යානුකූල සහ ආරක්ෂිත බැංකු මාර්ග හරහා මෙරටට ගෙන්වා ගැනීමට පැවති අභියෝගවලට මෙමඟින් ස්ථිර විසඳුමක් ලැබෙන බවයි. එමෙන්ම, මෙය රටේ විදේශ විනිමය ලැබීම් වර්ධනය කිරීමට සහ විනිවිදභාවයෙන් යුත් මූල්ය පද්ධතියක් ශක්තිමත් කිරීමට දායක වනු ඇත.
කොමර්ෂල් බැංකුව මීට පෙරද ලංකාවට හඳුන්වා දුන් ප්රථම QR-පාදක ගෙවීම් යෙදුම වන ‘Q+ Payment App’, ‘Tap-to-Pay’ විසඳුම් සහ Google Pay වැනි නවීන තාක්ෂණයන් හරහා ඩිජිටල් බැංකු ක්ෂේත්රයේ සිය ප්රමුඛත්වය අඛණ්ඩව පවත්වා ගෙන යයි. එම දක්ෂතා ඇගයීමට ලක්කරමින්, ‘LankaPay Technovation Awards 2026’ උළෙලේදී අඛණ්ඩව දෙවන වරටත් ‘Excellence in Digital Payments’ සම්මානය ඇතුළු සම්මාන හතක් දිනා ගැනීමට බැංකුව සමත් විය.
ඩිජිටල් ජීවන රටාවකට පාරිභෝගිකයින් යොමුවීම සැලකිල්ලට ගනිමින්, කොමර්ෂල් බැංකුව ඉදිරියටත් තම පාරිභෝගිකයින්ට වඩාත් වේගවත්, ආරක්ෂිත සහ පහසු මූල්ය සේවා ලබා දීම සඳහා තාක්ෂණය කෙරෙහි අඛණ්ඩව ආයෝජනය කිරීමට බලාපොරොත්තු වේ.
