ලංකා ඛනිජ තෙල් නීතිගත සංස්ථාවට (සිපෙට්කෝ) අයත් දිවයින පුරා පිහිටි පිරවුම්හල් රැසක ඔක්ටේන් 95 පෙට්රල් සහ සුපර් ඩීසල් ඉන්ධන වර්ග දෙකේ දැඩි හිඟයක් පවතින බව ඛණිජ තෙල් බෙදුම්කරුවන්ගේ සංගමය පවසයි. මෙම සුපිරි ගණයේ ඉන්ධන වර්ග දෙකෙහි තොග ඇණවුම් කර පවත්වාගෙන යාම සඳහා පිරවුම්හල් හිමියන් රුපියල් ලක්ෂ 30කට වඩා වැඩි විශාල මුදලක් ආයෝජනය කළ යුතු වුවද, එම සමස්ත තොගයම අලෙවි කිරීමෙන් පිරවුම්හලකට ලැබෙන මෙහෙයුම් ලාභාංශය (Profit Margin) රුපියල් 45,000ක් වැනි ඉතා සුළු මුදලකට සීමා වී තිබීම මෙම තත්ත්වයට ප්රධානතම හේතුව වී ඇත.
එම සංගමය පෙන්වා දෙන්නේ, ඔක්ටේන් 95 පෙට්රල් සහ සුපර් ඩීසල් සඳහා පවතින ඉල්ලුම අඩු බැවින් පිරවුම්හලක දෛනික අලෙවිය ලීටර් 500කටත් වඩා අඩු මට්ටමක පවතින බවයි. මේ හේතුවෙන් මිලදී ගන්නා තොගයක් මුළුමනින්ම අලෙවි කර අවසන් කිරීමට සති දෙකකට වඩා වැඩි කාලයක් ගතවන අතර, එමඟින් ලැබෙන රුපියල් 45,000ක ලාභය පිරවුම්හල් සේවකයන්ගේ වැටුප් ගෙවීමටවත් ප්රමාණවත් නොවන බව බෙදුම්කරුවෝ පවසති. මේ අතර, මෙරට ක්රියාත්මක විදේශීය ඉන්ධන සමාගම් (LIOC, Sinopec වැනි) මෙම ඉන්ධන දෙවර්ගය වෙනුවෙන් උපරිම සිල්ලර මිලට සාපේක්ෂව 3%ක ඉහළ වට්ටමක් බෙදුම්කරුවන්ට ගෙවන අතර, එය ලංකා ඛනිජ තෙල් සංස්ථාව ලබාදෙන ප්රතිශතයට වඩා දෙගුණයකටත් වඩා වැඩි අගයකි. සංස්ථාවෙන් ලැබෙන අවම ලාභය නිසා කොළඹ නගරයෙන් බැහැර ප්රදේශවල සංස්ථා පිරවුම්හල් හිමියන් මෙම ඉන්ධන ඇණවුම් කිරීමෙන් වැළකී සිටින අතර, මේ හේතුවෙන් නවීන පන්නයේ සුඛෝපභෝගී වාහන භාවිත කරන පාරිභෝගිකයන් රට පුරා දැඩි අපහසුතාවට පත්ව සිටිති.
