ශ්රී ලංකාව තුළ සීඝ්රයෙන් පැතිර යන ඩෙංගු රෝගී තත්ත්වය පාලනය කිරීම සඳහා, රෝගීන් වැඩි වශයෙන් වාර්තා වන අධි අවදානම් කලාපවල පිහිටි පාසල්, විශ්වවිද්යාල සහ වෘත්තීය පුහුණු ආයතන අවම වශයෙන් සති දෙකක කාලයකට වසා දමා එම පරිශ්රයන් පිරිසිදු කිරීමට පියවර ගන්නා ලෙස වෛද්ය හා සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සන්ධානය රජයෙන් ඉල්ලා සිටී.
වෛද්ය චමල් සංජීව මහතා පෙන්වා දෙන්නේ මේ වන විට දිවයිනෙන් වාර්තා වී ඇති සමස්ත ඩෙංගු රෝගීන් සංඛ්යාව 65,000 ඉක්මවා ඇති අතර, විශේෂයෙන්ම බස්නාහිර පළාතෙන් පමණක් සමස්ත රෝගීන්ගෙන් සැලකිය යුතු ප්රමාණයක් වාර්තා වන බවයි.
Newsfirst
දැනට පවතින තත්ත්වය අනුව, මොරටුව විශ්වවිද්යාලය සති දෙකක කාලයකට වසා දමා ඇති අතර, කොළඹ විශ්වවිද්යාලය ඇතුළු තවත් ආයතන කිහිපයක් සිය අධ්යයන කටයුතු මාර්ගගත ක්රමයට සිදු කිරීමට පියවර ගෙන තිබේ. රෝහල් පද්ධතියේ පවතින දැඩි තදබදය සහ ප්රමාණවත් ඇඳන් නොමැති වීම හේතුවෙන් රෝගීන්ගේ ජීවිත දැඩි අවදානමකට ලක්ව ඇති බව වෛද්ය සංගම් අනතුරු අඟවයි. විශ්වවිද්යාල ප්රතිපාදන කොමිෂන් සභාව විසින් උපකුලපතිවරුන්ට උපදෙස් ලබා දී ඇත්තේ සෞඛ්ය තත්ත්වය සැලකිල්ලට ගෙන අවශ්ය වුවහොත් විශ්වවිද්යාල වසා දැමීමට පියවර ගන්නා ලෙසයි.
කෙසේ වෙතත්, වර්තමාන රජයේ ස්ථාවරය වී ඇත්තේ අධි අවදානම් කලාපවල පාසල් හෝ විශ්වවිද්යාල වසා දැමීමක් දැනට සිදු නොකරන බවයි. රෝගය තවදුරටත් පාලනයෙන් ගිලිහී යාමට පෙර, අධ්යාපන හා සෞඛ්ය අමාත්යාංශ එක්ව කඩිනම් සහ තීරණාත්මක පියවර ගත යුතු බව විශේෂඥ වෛද්යවරුන් තවදුරටත් අවධාරණය කරයි.
