සෞඛ්ය සම්පන්න ජාතියක් නිර්මාණය කිරීම යනු රටක ශක්තිමත් ආර්ථිකයක, ඵලදායී සමාජයක සහ සමෘද්ධිමත් අනාගතයක මූලික පදනම වන බැවින්, රට තුළ දුම්කොළ පරිභෝජනය අඩු කිරීම හුදෙක් සෞඛ්ය අරමුණක් පමණක් නොව ජාතික සංවර්ධනයේ ප්රධාන ප්රමුඛතාවයක් බව නියෝජ්ය සෞඛ්ය අමාත්ය හංසක විජේමුණි මහතා ප්රකාශ කර සිටියි. “Health TV” මාධ්ය වාර්තාවලට අනුව, නියෝජ්ය අමාත්යවරයා මෙම අදහස් පළ කර ඇත්තේ “ශ්රී ලංකාවේ දුම්කොළ භාවිතය හා දුම්පානය නැවැත්වීම වැඩි දියුණු කිරීමේ උපාය මාර්ග” පිළිබඳව පැවැති විශේෂ සාකච්ඡාවකට සහ මාධ්ය හමුවකට එක්වෙමිනි. මෙම කාලීන වැඩසටහන ශ්රී ජයවර්ධනපුර විශ්වවිද්යාලය, පේරාදෙණිය විශ්වවිද්යාලය, රජරට විශ්වවිද්යාලය, වයඹ විශ්වවිද්යාලය සහ ජෙනරාල් ශ්රීමත් ජෝන් කොතලාවල ආරක්ෂක විශ්වවිද්යාලය ඇතුළු දේශීය උසස් අධ්යාපන ආයතන රැසක් එක්ව “Respire” ගෝලීය සෞඛ්ය ව්යාපෘතිය යටතේ සංවිධානය කර තිබුණි.
මෙම සම්මන්ත්රණයේදී ප්රසන්න හේරත් මහතා විසින් දුම්පානය නිවාරණය කිරීම සඳහා වන විද්යාත්මක ක්රමවේදයන් හඳුන්වා දීමට පියවර ගත් අතර, ක්රිස් බුලන් (Chris Bullen) මහතා විසින් දුම්පානය නැවැත්වීමේ ජාතික වැඩසටහනක පවතින අත්යවශ්ය අවශ්යතාව පිළිබඳව විශේෂ ප්රධාන දේශනයක් පවත්වන ලදී. එහිදී වැඩිදුරටත් අදහස් දැක්වූ නියෝජ්ය සෞඛ්ය අමාත්යවරයා පෙන්වා දුන්නේ ලෝකයේ වළක්වා ගත හැකි මරණවලට බලපාන ප්රධානතම සාධකයක් වන්නේ දුම්කොළ භාවිතය බවයි. එමෙන්ම දුම්කොළ ආශ්රිත රෝගාබාධ හේතුවෙන් මෙරට සමස්ත සෞඛ්ය පද්ධතියට සහ ජාතික ආර්ථිකයට අතිවිශාල මූල්ය බරක් පැටවෙන බව ද හෙතෙම අවධාරණය කළේය.
දුම්පානය යනු සියයට සියයක්ම වළක්වා ගත හැකි සෞඛ්ය අවදානමක් බව පෙන්වා දුන් රජය, ඉදිරියේදී දුම්කොළ නිෂ්පාදන සඳහා පනවන බදු මුදල් තවදුරටත් වැඩි කිරීමටත්, තරුණ පරපුර ඉලක්ක කරගනිමින් දියත් වන සියලුම ආකාරයේ වක්ර අලෙවිකරණ උපක්රමවලට එරෙහිව දැඩි ක්රියාමාර්ග ගැනීමටත් කටයුතු කරන බව ප්රකාශ කර සිටියි. එසේම, වර්තමානයේ සමාජය වෙළාගනිමින් පවතින නව නිකොටින් ඇබ්බැහිවීම් (New Nicotine Addictions) පාලනය කිරීම සඳහා වත්මන් රජය සම්පූර්ණයෙන්ම කැපවී සිටින බව ද නියෝජ්ය අමාත්යවරයා මෙහිදී සහතික විය. මෙම සුවිශේෂී අවස්ථාව සඳහා ලෝක සෞඛ්ය සංවිධානයේ (WHO) නියෝජිතයන්, දුම්කොළ සහ මධ්යសාර පිළිබඳ ජාතික අධිකාරියේ (NATA) නිලධාරීන්, ශ්රී ලංකා වෛද්ය සංගමය (SLMA) සහ විවිධ රාජ්ය නොවන සංවිධාන නියෝජිතයන් ඇතුළු ක්ෂේත්රයේ ප්රවීණයන් විශාල පිරිසක් සහභාගී වී සිටියහ.
