යුද ජයග්රහණයට වසර 17ක් සපිරීම නිමිත්තෙන් ‘සර්වජන බලය’ පක්ෂයේ නායක, පාර්ලිමේන්තු මන්ත්රී දිලිත් ජයවීර මහතා විසින් විශේෂ නිල ප්රකාශයක් නිකුත් කර තිබේ. ලොව ම්ලේච්ඡතම සහ භයානකම ත්රස්තවාදයට එරෙහිව මෙරට වීරෝදාර රණවිරුවන් ලබා ගත් ශ්රේෂ්ඨ ජයග්රහණය මුළු මහත් ලෝකයම මවිත කිරීමට සමත් වූ බවත්, අප සමරන්නේ ත්රස්තවාදීන් ඉදිරියේ ලැබූ මිලිටරි ජයග්රහණය පමණක් නොව ඉන් පසුව රටක් ලෙස අප අත්පත් කරගත් මහා නිදහස් ජයග්රහණ සමුදාය බවත් ඔහු සිය සටහනින් පෙන්වා දෙයි.
දිලිත් ජයවීර මහතා අවධාරණය කරන්නේ මෙම යුද ජයග්රහණයේ විශාලතම ප්රතිලාභ ලැබුවේ උතුරේ සහෝදර දමිළ ජනතාව බවයි. ම්ලේච්ඡ කොටි නායකයා විසින් අහිංසක දමිළ දරුවන්ගේ කරේ සයනයිඩ් කරල් එල්ලා බලහත්කාරයෙන් තුවක්කු අතට දුන් අඳුරු අතීතය නිමා කර, අද වන විට උතුරේ දරුවන්ට නිදහසේ අධ්යාපනය ලබා විභාගවලින් ඉහළම ප්රතිඵල වාර්තා කිරීමට අවස්ථාව උදා වූයේ රණවිරුවන් නිසා බව ඔහු පවසයි. තවදුරටත් අප බෝම්බ බියෙන් බස් රථවලට ගොඩවන, රැකියාවට යන, හෝ රාත්රියට කැලෑ වදින ජාතියක් නොවන බවත්, ක්රීඩකයන් හෝ ආයෝජකයන් ලංකාවට පැමිණීමට දැන් බිය නොවන බවත් ඔහු සිහිපත් කරයි. ජාතික හා ජාත්යන්තර තලයේ සන්නාම සිය දහස් ගණනක් නිර්මාණය කර ඇති තම වෘත්තීය ජීවිතය තුළ, රණවිරුවන් වෙනුවෙන් “අපි වෙනුවෙන් අපි” ප්රචාරණ ව්යාපෘතිය දියත් කරමින් සමාජ ප්රතිරූපය වෙනස් කිරීමට දායක වීම තමන් ලැබූ ඉහළම ආත්ම තෘප්තිය බව පවසන මන්ත්රීවරයා, කෘතඥපූර්වක ශිෂ්ට ජාතියක් ලෙස මව්බිම පවතින තුරා මෙම වීරයන්ගේ කැපවීම් සැමරීම පරම වගකීමක් බව ද වැඩිදුරටත් සඳහන් කරයි.
