රජය විසින් සහල් ආනයනය කිරීමට ගත් තීරණය හේතුවෙන් මෙරට ගොවියාගේ වී කිලෝවක් සඳහා ලැබෙන සහතික මිල දරුණු ලෙස පහත වැටී ඇති බව ප්රමුඛ පෙළේ සහල් ව්යාපාරිකයෙකු වන ඩඩ්ලි සිරිසේන මහතා පවසයි. අද (06) මාධ්ය වෙත අදහස් දක්වමින් ඒ මහතා කියා සිටියේ රජයේ මෙම ක්රියාමාර්ගය පිළිබඳව තමන් දැඩි ලෙස කනගාටු වන බවයි.
දැනට වී සඳහා රජය නියම කර ඇති සහතික මිල ගණන් (නාඩු රු. 120, සම්බා රු. 125, කීරි සම්බා රු. 130) ප්රමාණවත් නොවන බව පෙන්වා දුන් සිරිසේන මහතා, උපතින්ම බර සහ අස්වැන්න අඩු සම්බා හා කීරි සම්බා වගාවන් ගොවියන් විසින් අත්හැර දමමින් පවතින බව ද සඳහන් කළේය. මේ හේතුවෙන් ගොවීන් නාඩු වී පමණක් වගා කිරීමට පෙළඹීම නිසා වෙළෙඳපොළේ නාඩු සහල් මිල තවදුරටත් පහත වැටී අනෙක් සහල් වර්ග හිඟ වන බව ඔහු පෙන්වා දෙයි.
රට තුළ සහල් මිල තීරණය කිරීම හෝ පාලනය කිරීම තමන්ට කළ නොහැකි බවත්, එය පාලකයන් විසින් විසඳිය යුතු ගැටලුවක් බවත් පැවසූ ඩඩ්ලි සිරිසේන මහතා, ඉදිරියේදී ගොවීන්ට සිය වී විකුණාගත නොහැකි බරපතළ අර්බුදයක් මතුවන බවට අනතුරු ඇඟවීය.
“අපේ රටට සහල් ටොන් එක්ලක්ෂ පනස් හත්දහසක් (157,000) ගෙනල්ලා දැම්මා. සමහර ගොවියෝ මේවට අපිටත් චෝදනා කරනවා. නමුත් රටින් හාල් ගේන ප්රශ්නය නොතිබුණා නම්, ගොවීන්ට කිසිම ප්රශ්නයක් නැතිව වී කිලෝවක් රුපියල් 125-130 කට විකුණගන්න තිබුණා. අද ඒක රුපියල් 90-100 දක්වා වැටිලා තියෙන්නේ ඒ නිසයි. ඒ ගැන මටත් තියෙන්නේ ලොකු කනගාටුවක්” යැයි ද ඔහු වැඩිදුරටත් අවධාරණය කළේය.
