පාස්කු ප්රහාර විමර්ශනවලට බාධා කිරීම සහ අධිකරණයට අපහාස කිරීමේ චෝදනා මත උදය ගම්මන්පිල, විමල් වීරවංශ සහ දිලිත් ජයවීර ඇතුළු පිරිසක් සම්බන්ධයෙන් අපරාධ පරීක්ෂණ දෙපාර්තමේන්තුව විසින් විමර්ශනයක් ආරම්භ කර තිබේ. පාස්කු ඉරිදා ත්රස්ත ප්රහාරය සම්බන්ධයෙන් සිදුකරනු ලබන විමර්ශනවලට බලපෑම් ඇතිවන පරිදි සහ අධිකරණයේ ස්වාධීනත්වයට හානිවන අයුරින් හිටපු ජාතික බුද්ධි ප්රධානී සුරේෂ් සලේ සම්බන්ධයෙන් විද්යුත් හා සමාජ මාධ්ය ඔස්සේ ප්රකාශ නිකුත් කිරීම මෙම විමර්ශනයට පාදක වී ඇත. මෙම කාරණය සම්බන්ධයෙන් අපරාධ පරීක්ෂණ දෙපාර්තමේන්තුව විසින් පිටු දාහතරකින් යුත් වැඩිදුර වාර්තාවක් කොටුව මහේස්ත්රාත් පසන් අමරසේන මහතා වෙත අද (15) ඉදිරිපත් කරනු ලැබීය.
හිටපු මන්ත්රීවරුන් වන උදය ගම්මන්පිල, විමල් වීරවංශ, පාර්ලිමේන්තු මන්ත්රී දිලිත් ජයවීර, සුගීෂ්වර බණ්ඩාර, අසංක නවරත්න සහ මහින්ද පතිරණ යන පිරිස විසින් සිදුකරන ලද ප්රකාශවලින් අධිකරණය කෙරෙහි මහජන අපකීර්තියක් ඇතිවීමටත්, අධිකරණ ක්රියාවලියට බාධා කිරීමටත් උත්සාහ දරා ඇති බව පරීක්ෂණ වාර්තාවේ සඳහන් වේ. මෙම සිද්ධියට අදාළව තෙවන සැකකරු ලෙස නම් කර ඇති හිටපු ජාතික බුද්ධි ප්රධානී සුරේෂ් සලේ මේ වනවිට රැඳවුම් නියෝග මත පසුවන අතර, ඔහු පසුගිය 5 වන දින සිට ආහාර වර්ජනයක නිරත වෙමින් ජාතික රෝහලේ ප්රතිකාර ලබන බවද අපරාධ පරීක්ෂණ දෙපාර්තමේන්තුව අධිකරණය හමුවේ කරුණු දැක්වීය. මෙවැනි ප්රකාශ දේශපාලනිකව සංවිධානය වූ කණ්ඩායම්වල උවමනාව මත සිදුකරන බවටද විමර්ශන නිලධාරීන් සැක පළ කරයි.
අධිකරණයට අපහාස වන අයුරින් ප්රකාශ නිකුත් කළ පාර්ශවයන්ට එරෙහිව නොතීසි නිකුත් කරන ලෙස අපරාධ පරීක්ෂණ දෙපාර්තමේන්තුව කළ ඉල්ලීම සම්බන්ධයෙන් අදහස් දැක්වූ මහේස්ත්රාත්වරයා, එම කරුණු අභියාචනාධිකරණය වෙත යොමු කළ හැකි බව දැනුම් දුන්නේය. 2024 අංක 8 දරණ පනතේ 3(1) වගන්තිය ප්රකාරව මෙලෙස කරුණු දැක්වීම දඬුවම් ලැබිය හැකි වරදක් බව පෙන්වා දෙන නීති ක්ෂේත්රයේ විද්වතුන්, ඉදිරියේදී නීතිය ක්රියාත්මක කිරීමේ ස්වාධීනත්වය සහ දේශපාලන බලපෑම් පිළිබඳ බරපතළ කතිකාවතක් රට තුළ ගොඩනැගෙනු ඇති බව අවධාරණය කරයි.
