කොංගෝ රාජ්යය තුළ එබෝලා (Ebola) වෛරසය යළිත් වේගයෙන් පැතිර යාමේ අවදානමක් මතුව ඇති බව අප්රිකානු සෞඛ්ය අංශ උපුටා දක්වමින් විදෙස් වාර්තා සඳහන් කරයි. දැනට වාර්තා වී ඇති තොරතුරුවලට අනුව සැකකටයුතු රෝගීන් 246ක් පමණ හඳුනාගෙන ඇති අතර, ඉන් පුද්ගලයන් 65ත් 80ත් අතර ප්රමාණයක් මියගොස් ඇති බවට තහවුරු වී තිබේ. ලෝක සෞඛ්ය සංවිධානය පෙන්වා දෙන්නේ මෙවර ව්යාප්ත වන්නේ ‘බුන්ඩිබුග්යෝ’ (Bundibugyo) නැමැති එබෝලා වෛරස් ප්රභේදය බවයි.
අධික උණ, ශරීරයේ වේදනාව, වමනය, පාචනය සහ අභ්යන්තර හෝ බාහිර ලේ ගැලීම් මෙම රෝගයේ ප්රධාන රෝග ලක්ෂණ වන අතර, රෝගීන්ගෙන් 50%ක් පමණ මියයෑමේ දැඩි අවදානමක් පවතී. මෙම ප්රභේදය සඳහා මෙතෙක් නිල වශයෙන් අනුමත කළ එන්නතක් නොමැති වීම රෝගය පාලනය කිරීමට ඇති ප්රධානතම බාධාව වී ඇත. කොංගෝවේ පවතින රන් පතල් ආශ්රිත සේවය සහ ජනතාව නිතර සංචාරය කිරීම හේතුවෙන් උගන්ඩාව සහ දකුණු සුඩානය වැනි අසල්වැසි රටවලට ද රෝගය පැතිරීමේ අවදානමක් පවතින බැවින් එම රටවල් ඒකාබද්ධව සීමා මායිම් පරීක්ෂා කිරීමේ දැඩි පියවර ගනිමින් සිටියි.
