ඉරානය සහ ඇමරිකා එක්සත් ජනපදය අතර පවතින ගැටුම් නිමා කිරීමේ සාකච්ඡා සම්බන්ධයෙන් අදහස් දක්වමින් ඉරාන විදේශ අමාත්ය අබ්බාස් අරාග්චි පවසන්නේ තම රටට ඇමරිකාව කෙරෙහි කිසිදු විශ්වාසයක් නොමැති බවයි. ඉරානය සාකච්ඡා සඳහා සූදානම් වන්නේ ඇමරිකාව ඒ පිළිබඳව සැබෑ උනන්දුවක් සහ බැරෑරුම් ප්රවේශයක් දක්වන්නේ නම් පමණක් බව ඔහු අවධාරණය කළේය. බ්රික්ස් (BRICS) විදේශ අමාත්යවරුන්ගේ හමුවට සහභාගී වීම සඳහා ඉන්දියාවේ නවදිල්ලි නුවරට පැමිණ සිටින අරාග්චි මහතා මාධ්ය වෙත අදහස් දක්වමින් කියා සිටියේ හෝමුස් සමුද්ර සන්ධිය හරහා යාත්රා කිරීමට ඉඩ ලබා දෙන්නේ ඉරානය සමඟ යුද්ධයක නොමැති නෞකාවලට පමණක් බවයි.
පසුගිය පෙබරවාරි මාසයේදී ඇමරිකාව සහ ඉරානය අතර ඇති වූ යුදමය තත්ත්වයත් සමඟ ලෝකයේ තෙල් සහ ගෑස් සැපයුමෙන් පහෙන් එකක් හසුරුවන හෝමුස් සමුද්ර සන්ධිය වසා දැමීමට ඉරානය පියවර ගත්තේය. පසුගිය මාසයේදී දෙපාර්ශ්වය අතර සටන් විරාමයක් ප්රකාශයට පත් කළ ද, ස්ථිර සාම ගිවිසුමක් ඇති කර ගැනීමට මෙතෙක් නොහැකි වී තිබේ. පකිස්ථානයේ මැදිහත්වීමෙන් සිදුවන සාම සාකච්ඡා පසුගිය සතියේදී දෙපාර්ශ්වයම ඉදිරිපත් කළ යෝජනා ප්රතික්ෂේප කිරීම නිසා අඩාල වී ඇති අතර, ඇමරිකාව ලබා දෙන පරස්පර පණිවිඩ හේතුවෙන් ඔවුන්ගේ සැබෑ අභිප්රාය පිළිබඳව සැකයක් පවතින බව විදේශ අමාත්යවරයා පවසයි. ඉරානයේ න්යෂ්ටික වැඩපිළිවෙළ සහ හෝමුස් සමුද්ර සන්ධියේ පාලනය පිළිබඳ ගැටලු සාකච්ඡා මාර්ගයෙන් විසඳා ගැනීමට උත්සාහ කරන නමුත්, අවශ්ය වුවහොත් නැවත යුද වැදීමට ද ඉරානය සූදානම් බව ඔහු වැඩිදුරටත් සඳහන් කළේය.
