කොලොම්බියාව සමඟ පවතින දේශසීමා ආරවුල් සහ ආරක්ෂක ගැටලු මුල් කරගනිමින් කොලොම්බියාවෙන් ආනයනය කරනු ලබන භාණ්ඩ සඳහා පනවා තිබූ බදු සියයට 50 සිට සියයට 100 දක්වා ඉහළ නැංවීමට ඉක්වදෝර රජය තීරණය කර තිබේ. දේශසීමා ආශ්රිතව සිදුවන මත්ද්රව්ය ජාවාරම් මැඩපැවැත්වීමට කොලොම්බියාව ප්රමාණවත් පියවර නොගන්නා බවට චෝදනා කරමින් ඉක්වදෝරය මෙම පියවර ගෙන ඇති අතර නව බදු සංශෝධන ලබන මැයි 01 වනදා සිට ක්රියාත්මක වීමට නියමිතය. මෙම තීරණය සම්බන්ධයෙන් කොලොම්බියානු ජනාධිපති ගුස්ටාවෝ පෙට්රෝ දැඩි විරෝධය පළ කර ඇති අතර මෙය මහත් විපත්තියක් ලෙස හඳුන්වමින් ඉක්වදෝරයේ මෙම ක්රියාව නිසා කලාපීය වෙළඳ ගිවිසුම්වල වටිනාකම ගිලිහී යන බව ප්රකාශ කර ඇත.
දෙරට අතර පවතින මෙම ආතති සහගත තත්ත්වයට කරුණු කිහිපයක් බලපා ඇති අතර දැනටමත් බලශක්ති අර්බුදයකට මුහුණ දී සිටින ඉක්වදෝරයට කොලොම්බියාව විසින් විදුලිය අලෙවි කිරීම අත්හිටුවීම ඉන් ප්රධාන වේ. එමෙන්ම පසුගිය මාසයේ දේශසීමා ආසන්නයේ සිදු වූ ආරක්ෂක මෙහෙයුමකදී පුද්ගලයින් 14 දෙනෙකු මියයෑම සහ ඉක්වදෝරයේ හිටපු උප ජනාධිපති ජෝර්ජ් ග්ලාස් සිරගත කිරීම සම්බන්ධයෙන් ඇති වූ රාජ්ය තාන්ත්රික ගැටලු ද මීට හේතු වී තිබේ. ඉක්වදෝරය සිය තානාපතිවරයාව ද නැවත කැඳවා ඇති අතර ලබන සතියේ පැවැත්වීමට නියමිතව තිබූ වෙළඳ සහ ආරක්ෂක සහයෝගීතා සාකච්ඡා ද මේ වන විට අත්හිටුවා ඇත.
මෙම බදු ඉහළ නැංවීම හරහා ඉක්වදෝරය සිය වෙළඳ හිඟය අවම කරගැනීමට බලාපොරොත්තු වුවද ඖෂධ සහ කෘෂිකර්මාන්තයට අවශ්ය පළිබෝධනාශක විශාල වශයෙන් කොලොම්බියාවෙන් ආනයනය කරන බැවින් එය ඉක්වදෝරයේ අභ්යන්තර ආර්ථිකයට සහ පාරිභෝගික මිල ගණන් ඉහළ යාමට ද සෘජුව බලපෑම් එල්ල කළ හැකි බව විචාරකයෝ පෙන්වා දෙති. කොලොම්බියානු බලධාරීන් පවසන්නේ ඉක්වදෝර ජනාධිපති ඩැනියෙල් නොබෝවා සහයෝගීතාව වෙනුවට ගැටුම්කාරී මාවතක් තෝරාගෙන ඇති බවයි.
