ඉදිරියේදී ශ්රී ලංකාවට බලපානු ඇතැයි පුරෝකථනය කර ඇති දරුණු ‘එල් නිනෝ’ (El Niño) කාලගුණික විපර්යාසය හේතුවෙන් රටේ ප්රධාන ජල මූලාශ්ර සිඳී යාමේ අවදානමක් පවතින බව ආපදා කළමනාකරණ මධ්යස්ථානය (DMC) අනතුරු අඟවයි.
මෙම තත්ත්වය සම්බන්ධයෙන් අදහස් දක්වමින් ආපදා කළමනාකරණ මධ්යස්ථානයේ අතිරේක ලේකම් කේ.ජී.බී. ධර්මතිලක මහතා සඳහන් කළේ, ඉදිරියේදී උද්ගත විය හැකි දැඩි නියඟය හමුවේ ජනතාවට පානීය ජලය සැපයීම සඳහා මුහුදු ජලය පිරිපහදු කර බෙදා හැරීමට පවා සිදුවිය හැකි බවයි. පවතින ජල බවුසර් ප්රමාණය හදිසි ආපදා තත්ත්වයකදී ප්රමාණවත් නොවන බැවින්, මෙම අභියෝගයට මුහුණ දීම සඳහා කල්තියා සූදානම් වීම අත්යවශ්ය බව ඔහු අවධාරණය කළේය.
එල් නිනෝ තත්ත්වය හේතුවෙන් ජූලි සහ අගෝස්තු මාසවලදී වර්ෂාපතනය තියුණු ලෙස පහත වැටීම හේතුවෙන් දරුණු නියඟයකට මුහුණ දීමට ඉඩ ඇති අතර, එය කෘෂිකාර්මික කටයුතුවලට සහ පානීය ජල සැපයුමට බරපතල බලපෑමක් එල්ල කළ හැක. ඔක්තෝබර් සහ නොවැම්බර් මාසවලදී අධික වර්ෂාපතනයක් සහ සුළි කුණාටු ඇති වීමේ හැකියාවක් පවතින අතර, නැවතත් ජනවාරි සිට අප්රේල් දක්වා උණුසුම් කාලගුණික තත්ත්වයක් අපේක්ෂා කළ හැක. පැසිෆික් සාගරයේ මුහුදු මතුපිට උෂ්ණත්වය ඉහළ යාම හේතුවෙන් සිදුවන මෙම ස්වාභාවික සංසිද්ධිය ගෝලීය කාලගුණ රටා අවුල් කරවන අතර ශ්රී ලංකාව වැනි රටවල වර්ෂාපතනය අඩුවීමට හේතු වේ.
එක්සත් ජාතීන්ගේ කාලගුණ විද්යා නියෝජිතායතනය දැනටමත් අනතුරු අඟවා ඇත්තේ මෙය දශකයකින් ඇති විය හැකි ප්රබලතම එල් නිනෝ තත්ත්වය විය හැකි බවයි. රටේ ජල සුරක්ෂිතතාව වෙනුවෙන් බලධාරීන්ගේ අවධානය මේ වන විටත් මෙවැනි විකල්ප ක්රියාමාර්ග වෙත යොමු වී ඇත්තේ එබැවිනි.
