OpenAI ආයතනය සහ එහි සම-නිර්මාතෘ සෑම් ඇල්ට්මන්ට එරෙහිව එලොන් මස්ක් විසින් ගොනු කර තිබූ නඩුවේ වංචා සහගත ක්රියාවන් පිළිබඳ චෝදනා (Fraud claims) ඉවත් කිරීමට අමෙරිකානු විනිසුරුවරියක් පියවර ගෙන තිබේ. කැලිෆෝනියා දිස්ත්රික් විනිසුරු ඉවෝන් ගොන්සාලෙස් රොජර්ස් විසින් මෙම තීරණය ගනු ලැබුවේ නඩු විභාගය වඩාත් විධිමත් කිරීම සඳහා අදාළ චෝදනා ඉවත් කරන ලෙස මස්ක් විසින්ම කරන ලද ඉල්ලීමකට අනුවය. කෙසේ වෙතත්, OpenAI ආයතනය සිය පුණ්ය අරමුණු පාවාදීම සහ අයුතු ලෙස ලාභ ලැබීම යන චෝදනා සම්බන්ධයෙන් වන නඩු විභාගය ලබන සඳුදා සිට ජූරි සභාවක් ඉදිරියේ ආරම්භ වීමට නියමිතය.
OpenAI ආයතනය මානව සංහතියේ යහපත සඳහා ලාභ නොලබන පදනමක් මත ක්රියාත්මක විය යුතු බව මස්ක්ගේ ප්රධාන තර්කය වන අතර, මයික්රොසොෆ්ට් සමාගමේ ආයෝජන සමඟ එය ලාභ ලබන ව්යාපාරයක් ලෙස පරිවර්තනය වීම හරහා මහජනතාව සහ තමන්ව රවටා ඇති බව ඔහු චෝදනා කරයි. මෙම නඩුව මගින් OpenAI ආයතනය “ධනය උපයන යන්ත්රයක්” වනු වෙනුවට එහි මුල් මෙහෙවරට නැවත යොමු කිරීම මස්ක්ගේ අරමුණ වී තිබේ. ලබන අඟහරුවාදා මෙහි මූලික දේශන ආරම්භ වීමට නියමිත අතර, මෙය ගෝලීය තාක්ෂණික ක්ෂේත්රයේ දැඩි අවධානයට ලක් වූ නඩු විභාගයක් වනු ඇතැයි අපේක්ෂා කෙරේ.
