එංගලන්තයේ දරුවන්ගේ සෞඛ්යය සහ යහපැවැත්ම සුරක්ෂිත කිරීමේ අරමුණින් අධික කැෆේන් අඩංගු එනර්ජි ඩ්රින්ක්ස් (ශක්තිජනක පාන) වයස අවුරුදු 16ට අඩු දරුවන්ට අලෙවි කිරීම තහනම් කිරීමට බ්රිතාන්ය රජය තීරණය කර තිබේ. මෙම නව නීතිය ලබන වසරේ අප්රේල් මාසයේ සිට ක්රියාත්මක වීමට නියමිත අතර එය එංගලන්තය පුරා පවතින සියලුම සිල්ලර වෙළඳසැල්, ආපනශාලා, අන්තර්ජාල වෙබ් අඩවි සහ ස්වයංක්රීය වෙළඳ යන්ත්ර සඳහා ද බලපැවැත්වේ.
මෙම තහනම ලීටරයකට කැෆේන් මිලිග්රෑම් 150කට වඩා අඩංගු පාන වර්ග සඳහා පමණක් ක්රියාත්මක වන අතර තේ සහ කෝපි වර්ග ඒ සඳහා ඇතුළත් නොවේ. දිනපතා එංගලන්තයේ දරුවන් ලක්ෂයකට අධික සංඛ්යාවක් මෙවැනි පාන වර්ග පරිභෝජනය කරන බවත්, ඒවා මගින් දරුවන්ගේ නින්දට බාධා වීම, කාංසාව, සහ පාසල් අධ්යාපන කටයුතු කෙරෙහි පවතින ඒකාග්රතාවය ගිලිහී යාම වැනි බරපතල සෞඛ්ය ගැටලු ඇතිවන බවත් පර්යේෂණ මගින් තහවුරු වී ඇත.
එම නිසා දරුවන්ගේ සෞඛ්යය ආරක්ෂා කිරීම රජයේ ප්රමුඛ වගකීමක් බව පෙන්වා දෙන බලධාරීන්, මෙම නීතිය කඩකරන වෙළඳුන්ට එරෙහිව පවුම් 2,500ක් දක්වා දඩ මුදල් පැනවීමට ද පියවර ගෙන ඇත. දරුවන්ගේ සෞඛ්යය දියුණු කිරීම වෙනුවෙන් රජය විසින් ක්රියාත්මක කරන පුළුල් වැඩසටහනක තවත් පියවරක් ලෙස මෙම තහනම හඳුන්වා දී ඇති අතර, මීට අමතරව වයස අවුරුදු 16ට අඩු දරුවන් සඳහා සමාජ මාධ්ය භාවිතය සීමා කිරීමට ද රජය සැලසුම් කර තිබේ.
තොරතුරු උපුටා ගැනීම: Reuters ඇසුරින්
