පරිසර අමාත්යාංශය සහ ශ්රී ලංකා රේගු දෙපාර්තමේන්තුව අතර පවතින අන්තර් ආයතනික සම්බන්ධීකරණය වඩාත් ශක්තිමත් කිරීමේ අරමුණින් යුත් විශේෂ සාකච්ඡාවක් පරිසර අමාත්ය වෛද්ය දම්මික පටබැඳි සහ පරිසර නියෝජ්ය අමාත්ය ඇන්ටන් ජයකොඩි යන මහත්වරුන්ගේ ප්රධානත්වයෙන් අද (12) ශ්රී ලංකා රේගු මූලස්ථානයේදී පැවැත්විණි.
මෙම අවස්ථාව සඳහා පරිසර අමාත්යාංශයේ ලේකම් කේ.ආර්. උඩුවාවල, රේගු අධ්යක්ෂ ජනරාල්වරයා ඇතුළු පරිසර අමාත්යාංශය, වෛද්ය පර්යේෂණ ආයතනය, ජාතික ශාක නිරෝධායන සේවය සහ සත්ව නිෂ්පාදන සහ සෞඛ්ය දෙපාර්තමේන්තුවේ ජ්යෙෂ්ඨ නිලධාරීහු පිරිසක් සහභාගී වූහ. රටේ පාරිසරික සුරක්ෂිතතාව, ජෛව ආරක්ෂණය සහ ආනයන-අපනයන ක්රියාවලීන් වඩාත් විධිමත් කිරීම වෙනුවෙන් වැදගත් තීන්දු තීරණ රැසක් කෙරෙහි මෙහිදී සෘජු අවධානය යොමු වූ අතර, නිලධාරීන් ශ්රී ලංකා රේගු දෙපාර්තමේන්තුවේ කෞතුකාගාරය නැරඹීමට ද එක් විය.
නීතිවිරෝධී ලෙස මෙරටට රහසිගතව ගෙන එනු ලබන සතුන් මඟින් රට තුළ රෝග ව්යාප්ත වීම වැළැක්වීම සහ ජෛව ආරක්ෂණ (Biosecurity) ක්රමවේද ශක්තිමත් කිරීම සඳහා විශේෂිත ‘සත්ව නිරෝධායන මධ්යස්ථාන’ ස්ථාපිත කිරීම කෙරෙහි මෙහිදී මූලික අවධානයක් යොමු කෙරිණි. එමෙන්ම, ශ්රී ලංකා රේගුවේ වාප්පු ලිපිකරුවන් (Customs House Agent) යොදා ගන්නා සාර්ථක ක්රමවේදය, පරිසර අමාත්යාංශයට අදාළ ආයතනවල මඟ පෙන්වන්නන් (Guides/Facilitators) සඳහා ද ආදේශ කරමින් සංචාරක ප්රවර්ධන කටයුතු වඩාත් කාර්යක්ෂම කිරීමට ද සාකච්ඡා විය.
මීට අමතරව, විද්යාත්මක පර්යේෂණ සහ පාරිසරික විශ්ලේෂණ සඳහා අත්යවශ්ය වන රසායනික ද්රව්ය ප්රමාදයකින් තොරව නිදහස් කර ගැනීමට සුදුසු යාන්ත්රණයක් සකස් කිරීමේ වැදගත්කම මෙහිදී පෙන්වා දෙන ලදී. රට තුළට ප්ලාස්ටික් ආනයනය කිරීම සහ සායනික අපද්රව්ය (Clinical Waste) ඇතුළුවීම දැඩි ලෙස පාලනය කිරීම සඳහා පවතින නීතිමය ක්රමවේදයන් තවදුරටත් ශක්තිමත් කිරීමටත්, රට තුළට ගෙන්වන සහ රටින් බැහැරට රැගෙන යන පටක රෝපිත ද්රව්ය (Tissue Culture Materials) සම්බන්ධයෙන් වඩාත් යෝග්ය හා විද්යාත්මක ක්රමවේදයක් සකස් කිරීමටත් මෙහිදී එකඟතාව පළ විය. රටේ ජෛව විවිධත්වය ආරක්ෂා කිරීම උදෙසා මෙම තීරණ කඩිනමින් ක්රියාත්මක කිරීමට පරිසර අමාත්යාංශයේ සහ ශ්රී ලංකා රේගුවේ උසස් නිලධාරීන්ගෙන් සැදුම්ලත් ඒකාබද්ධ වැඩපිළිවෙළක් ඉදිරියට ක්රියාත්මක කිරීමට කටයුතු කෙරේ.
