යුරෝපා සංගමයේ මීතේන් විමෝචන නීති උල්ලංඝනය කරන තෙල් සහ ගෑස් සමාගම් වෙත පැනවීමට නියමිතව තිබූ දැඩි දඬුවම් තාවකාලිකව අත්හිටුවීමට යුරෝපා කොමිසම සලකා බලමින් සිටින බව වාර්තා වේ. කර්මාන්ත ක්ෂේත්රයෙන් සහ ඇමරිකානු රජයෙන් එල්ල වූ දැඩි බලපෑම් හමුවේ මෙම තීරණය ගැනීමට සූදානම් වන බව රොයිටර් පුවත් සේවය සඳහන් කරයි. විශේෂයෙන්ම 2027 වසරේ සිට ක්රියාත්මක වීමට නියමිතව ඇති දැඩි රෙගුලාසි නිසා යුරෝපයට ඉන්ධන ආනයනය කිරීමේ ක්රියාවලියට බාධා එල්ල විය හැකි බවට බලශක්ති සමාගම් අනතුරු අඟවා තිබේ.
යුරෝපා කොමිසම විසින් සකස් කරන ලද කෙටුම්පතකට අනුව බලශක්ති සැපයුම් අර්බුදයක් පවතින අවස්ථාවලදී මෙම නීති උල්ලංඝනය කරන සමාගම්වලට එරෙහිව දඬුවම් ක්රියාත්මක නොකිරීමට ජාතික බලධාරීන්ට අවස්ථාව හිමිවනු ඇත. එම ලේඛනයේ සඳහන් වන්නේ බලශක්ති සැපයුමේ ආරක්ෂාව තහවුරු වන තෙක් දඬුවම් පැමිණවීම ප්රමාද කළ යුතු බවයි. ඉරාන යුද්ධය හේතුවෙන් ලෝක වෙළඳපොළේ තෙල් සහ ගෑස් මිල ඉහළ ගොස් ඇති පසුබිමක බලශක්ති සුරක්ෂිතතාවය වෙනුවෙන් මෙම පියවර ගැනීමට රජයන් පෙළඹී තිබේ.
කෙසේ වෙතත් පරිසර ක්රියාකාරීන් මෙම තීරණය දැඩි ලෙස විවේචනය කරන අතර ඔවුන් පවසන්නේ දඬුවම් ලිහිල් කිරීම හරහා හරිතාගාර වායු විමෝචනය පාලනය කිරීමට ඇති හැකියාව අඩපණ වන බවයි. කාබන් ඩයොක්සයිඩ් වායුවට පසුව දේශගුණික විපර්යාස සඳහා දෙවනුවට වැඩිම බලපෑමක් එල්ල කරන්නේ මීතේන් වායුව වන බැවින් එය පාලනය කිරීම ඉතා වැදගත් වේ. සමාගම්වලට පැනවීමට තිබූ දඩ මුදල් ලිහිල් කිරීම හරහා පාරිසරික අරමුණු ඉටු කර ගැනීම තවදුරටත් අසීරු වනු ඇති බව පරිසරවේදීන්ගේ මතයයි.
